Etne-bacon i særklasse får Spesialitet

Frå røykeriet i Etne til scena på Dyrsku’n i Seljord: Fredag fekk Skakke Røykeri kvalitetsutmerkinga Spesialitet for Skakke Bålbacon av landbruks- og matminister Nils Kristen Sandtrøen.

– Dyrsku’n handlar om norske råvarer, tradisjonar og stoltheit over det vi produserer. Derfor er dette ein svært passande arena for å løfte fram eit produkt som representerer nettopp dette, sa landbruks- og matminister Nils Kristen Sandtrøen under utdelinga.

Røykt på epletre

For Skakke Bålbacon startar kvalitetsarbeidet med nøye utvalde stykke svinekjøt med rett marmorering og tjukkleik. Deretter blir baconet tørrsalta, tørka og røyklagt på spon av epletre før det er klart for marknaden.

– Resultatet er eit kjøtfullt bacon med mild røykaroma og litt sødme. Fagjuryen trekkjer særleg fram den runde smaken og den gode balansen mellom salt og røyk, sa landbruks- og matminister Nils Kristen Sandtrøen.

Hos Skakke Røykeri er gleda stor over å få den nasjonale kvalitetsutmerkinga.

– Dette er ein bacon som er skikkeleg handtverk, og vi vel ut dei beste marmorerte kjøttstykka før vi røykjer på epletreflis, seier Roy Martin Øyjord i Skakke Røykeri.

Om Spesialitet 

Spesialitet er merket som viser vegen til det beste av lokalmat og -drikke. For å få merket må produktet vurderast og godkjennast av ein uavhengig fagjury. Merket gjer det enklare for forbrukarane å finne produkt som skil seg ut gjennom råvarer, smak, handverk og historie.