Risa AS tek over driftsansvaret for vegane i Telemark vest

Frå i dag, 1. september, har entreprenøren Risa AS ansvaret for drifts- og vedlikehaldsoppgåver på riksvegar, europavegar og fylkesvegar i kommunane Bykle, Kviteseid, Nissedal, Tokke, Ullensvang, Fyresdal, Nome, Drangedal og Vinje. Totalt omfattar kontrakten 847 km veg, fordelt på 250 km riksveg og 597 km fylkesveg. 

Kontraktsbeløpet er 659 millionar kroner (eks. mva.). Kontrakten varer i fem år, med gjensidig høve til forlenging i inntil tre år. 

Stordriftsfordelar sparer millionbeløp 

– Vi ser fram til å samarbeide med Risa og Telemark fylkeskommune om vegnettet vest i Telemark. Saman skal vi sørgje for god framkome for dei som bruker vegane, seier Marianne Øhrn, avdelingsdirektør for Drift og vedlikehald sør i Statens vegvesen. 

Telemark fylkeskommune og Statens vegvesen har gått saman om denne driftskontrakten for å oppnå stordriftsfordelar og utnytte ressursane betre. Fram til regionreforma i 2020 var driftskontraktane felles for statlege og fylkeskommunale vegar, men etter reforma har Statens vegvesen og fylkeskommunane hatt eigne driftskontraktar for vegnettet sitt. 

– Saman har vi sett på fordelane ved å ha éin felles kontrakt. Utrekningar viser at det er potensial for å spare opptil 27 millionar kroner. Ein felles kontrakt med fylkeskommunen gir færre parallelle prosessar og ein meir føreseieleg vegstandard for trafikantane, fortel Øhrn. 

Godt samarbeid til beste for trafikantane 

Kontrakten omfattar mellom anna vinterdrift med brøyting og strøing, vedlikehald av grøfter og stikkrenner, rasteplassar, skilt og vegetasjonsrydding, i tillegg til inspeksjon av vegnettet. Arbeidet skal sikre god framkome og trafikktryggleik gjennom heile året. 

– Vi er klare, og gleder oss til å se de røde maskinene våre ute på vegene i Telemark vest. Vi er glade for tilliten og ser fram til å samarbeide med Statens vegvesen og Telemark fylkeskommune. De siste månedene har vi brukt på å bygge organisasjon, etablere beredskap og gjøre folk og utstyr klare til oppstart. Nå handler det om å levere hver eneste dag slik at trafikantene opplever trygge og framkommelige veger gjennom hele året, sier Bjørn Risa, daglig leder i Risa AS.

For trafikantane inneber entreprenørskiftet i hovudsak at nye mannskap og køyretøy vil vere å sjå langs vegane. Oppgåvene med å halde vegnettet trygt og framkomeleg held fram som normalt. 

Denne pilotkontrakten er den første felleskontrakten mellom ein fylkeskommune og Statens vegvesen sidan regionreforma. 

– Vi har samarbeidd med Statens vegvesen om vegnettet i Telemark tidlegare, og no passa det for begge partar å gå saman om ein felles driftskontrakt. Vi ønskjer å halde fram det gode samarbeidet til beste for trafikantane i området, fortel Borgar Slørdal, seksjonsleiar for Vegdrift i Telemark fylkeskommune.

Andre driftskontraktar 

I tillegg til driftskontrakten Telemark vest har Statens vegvesen i dag oppstart av to andre driftskontraktar og tre elektrokontraktar. Dei to andre driftskontraktane gjeld Oslo og Bergen, medan elektrokontraktane gjeld Innlandet (veglys), Møre og Romsdal og Trøndelag. 

Fakta om driftskontraktane til Statens vegvesen: 

• All drift og vedlikehald av riksvegar blir utført av private entreprenørar på oppdrag frå Statens vegvesen. Slik har det vore sidan 2003. 

• Vegdriftskontraktane omfattar eit løpande ansvar for å halde vegane trygge og framkomelege og vareta beredskapen. Kontraktane inkluderer mellom anna vinterdrift som brøyting og strøing, reinhald, trafikkberedskap og enkelt vedlikehald. Asfaltering, vegoppmerking, større vedlikehaldsarbeid og utbetringar kjem utanom. 

• Elektrodriftskontraktane omfattar mellom anna veglys, signalanlegg og elektroinstallasjonar som vêrstasjonar, ventilasjon og tryggingssystem i tunnel. 

• Fram til regionreforma tok til å gjelde i 2020, var driftskontraktane felles for statlege og fylkeskommunale vegar. Etter reforma har Statens vegvesen ansvar for riksvegane, inkludert europavegar. Statens vegvesen kan likevel inngå avtalar med fylkeskommunar om felleskontraktar. 

• Statens vegvesen har 29 vegdriftskontraktar for riksveg over heile landet, inkludert ein felleskontrakt med fylkesveg. Talet på elektrodriftskontraktar er 19. Sjå heile oversikta her. 

• Standard kontraktsperiode er fem år, med høve til gjensidig opsjon på inntil tre år. I tillegg har Statens vegvesen opsjonsrett på ytterlegare eitt år. 

• Statens vegvesen ventar å bruke rundt 7 milliardar kroner på løpande drift av riksvegane i 2026.