På måndag startar utbedringa av E14

Måndag 31. august startar arbeidet med omlegging og utbedring av E14 på strekninga Håvreina-Bøstad. Arbeidet vil gå føre seg i fleire fasar:

• I første fase vert det sett opp sikringsutstyr langs eksisterande E14, og det vert gjennomført førebuande arbeid for ny avkøyrsle og vegløysing.
• Når fase 2 startar, vert trafikken lagd om. Køyretøy vil då bli leia gjennom anleggsområdet. Trafikken vert regulert med trafikklys i begge endar av arbeidsområdet, og det må påreknast noko ventetid.
• I dei vidare fasane vil trafikken gradvis bli flytta over på den nye vegen etter kvart som delstrekningar vert ferdigstilt.

Nye løysingar

Arbeidet vil pågå i to månader og omfattar etablering av nye køyrefelt på E14, samtidig som det vert bygd ny gang- og sykkelveg langs strekninga.

– Når prosjektet nærmar seg ferdigstilling vil trafikken gå i begge retningar på den nye E14, medan det siste arbeidet med gang- og sykkelvegen vert fullført, fortel byggjeleiar Kristian Hauståker.

– Vis omsyn

– Vi oppmodar alle trafikantar til å følgje skilting og signalregulering på staden, vise omsyn til anleggsarbeidarane og setje av litt ekstra tid ved passering av området, seier Hauståker.