Polhavstoktet på Nordpolen: Overraskande lite is

– Det er mindre is enn vi forventa, så vi kom fram til Nordpolen fire dagar tidlegare enn planlagd, seier toktleiar Paul Dodd frå Norsk Polarinstitutt.

– Vi kunne for det meste køyre i ope farvatn rundt isflaka. Vi brøyt nesten ikkje is i det heile, held han fram.

FF Kronprins Haakon var i området rundt Nordpolen i eit døgn. Forskarane om bord tok prøver av isen og det som lever på og under isen. Gjennom samarbeidet i Polhavet 2050, har forskarane no med seg nytt spesialutstyr, mellom anna eit kamera som kan ta høgoppløyte bilete av dei minste dyra og plantene som lev i isen – zooplankton og fytoplankton.

– Då kan vi sjå korleis næringskjedane i isen endrar seg når istypen vert annleis og temperaturane stig, seier Dodd.

Etter å ha segla over toppen av verda, sette FF Kronprins Haakon kursen vestover i retning Canada. Dei vil då reise lenger vest enn noko anna norsk forskingstokt av denne typen har gjort.

Toktet starta 23. juli frå Longyearbyen, og skal vare i 50 dagar.

Video og bilete frå toktet er tilgjengelege for pressa her: Polhavstokt 2026 til media