Nattarbeid med viktig kontroll av straumnett

– Vi legg slikt arbeid til sommarnatta fordi det gir tryggare arbeidsforhold, betre lys og minst mogleg ulempe for kundane, seier Else Margrethe Larsen og Ole-Bent Søreide frå HMS-avdelinga som var til stades under arbeidet.  

Det var varsla straumutkopling for alle straumkundar i området frå 23:30 til 05:30. Då var montørane klare til å klatre opp i straummaster, kontrollere dei og gjere nødvendige reparasjonar. 97 stolpepunkt vart kontrollerte. I tillegg vart det gjort kontroll og vask av fleire nettstasjonar og trafokioskar.  

– Slike utkoplingar gir oss eit sjeldan høve til å komme tett på anlegga og kontrollere tilstanden på ein trygg måte. Det er viktig arbeid for å sikre ei stabil straumforsyning også i åra som kjem, seier koordinator Torbjørn Jakobsen i Linja frå Nordfjordeid. 

Mannskap frå Eid, Sandane, Bremanger, Måløy, Stad og Fiskå deltok i arbeidet. I tillegg hadde driftssentralen ei sentral rolle gjennom heile natta. Dei sørgde både for trygge arbeidsforhold medan anlegget var utan straum, og for at nettet kunne koplast inn att område for område etter kvart som arbeidet vart ferdig.  

– Det vart gjort ein kjempejobb både ute i felt og på driftssentralen. Folk stod på heile natta, og innsatsen frå alle involverte var avgjerande for at vi kunne gjennomføre arbeidet som planlagt, seier Jakobsen. 

Arbeidet er ein del av Linja sitt kontinuerlege arbeid med å vedlikehalde og utvikle straumnettet i regionen, for å sikre ei trygg og stabil straumforsyning.