Store investeringar og godt årsresultat for Linja

-    Resultatet for 2025 gir Linja eit godt økonomisk utgangspunkt for dei store investeringane som ligg framfor oss på mellom 800 og 900 mill. kroner i året. Skal vi gjennomføre dei planlagde prosjekta i åra som kjem er det avgjerande at vi held fram med å levere gode resultat. Resultatet speglar den innsatsen som blir lagt ned kvar dag i heile verksemda, seier administrerande direktør i Linja, Helge Robert Midtbø.

Driftsinntektene i 2025 vart 1 982,2 millionar kroner, medan driftsresultatet vart 758,4 millionar kroner. Det er 346,1 millionar kroner betre enn året før. 

Årsaka til auken kjem hovudsakeleg frå eingongsinntekter, men kostnadsreduksjonar i den underliggande drifta har òg  bidrege positivt. Selskapet har ein nettkapital på om lag 6 250 millionar kroner.

- Investeringane i 2025 er retta mot både auka straumbehov og fornying av straumnettet. Det er avgjerande for å sikre kundane ei trygg og stabil straumforsyning i møte med nye behov og aukande forbruk. Samstundes skal vi levere gode resultat og langsiktig verdiskaping for eigarane, seier Midtbø. 

Aukar kapasiteten i nettet

Linja eig og driftar distribusjonsnettet frå Askvoll i sør til Ålesund i nord, og har om lag 107 500 kundar i distribusjonsnettet. I 2025 vart det levert 2 935 GWh til kundane i distribusjonsnettet, med ein auke på 35 GWh frå året før.

For å møte auka forbruk og nye behov har Linja siste tida styrka kapasiteten i nettet gjennom ei rekkje tiltak i ulike delar av regionen frå Indre Sogn til grensa mot Trøndelag. 

- Eitt viktig satsingsområde er spenningsoppgradering frå 66 kV til 132 kV på Søre Sunnmøre og i Indre Nordfjord. Arbeidet held fram i 2026 og 2027 og vil styrke forsyninga i to store regionar, seier Midtbø

Samstundes er arbeidet med kapasitetsauke i regionalt distribusjonsnett frå Indre Sogn til Florø i gang, noko som markerer ein viktig milepæl for forsyningstryggleiken i området.

I 2025 vart òg utviding og fornying av Giskemo transformatorstasjon avslutta. Dette gir betre driftssikkerheit for Sunnmøre.

I det lokale distribusjonsnettet vart det same år ferdigsilt fleire mindre og mellomstore anlegg, både som del av fornying av eksisterande nett og for å gi straumtilknyting til nye kundar. 

Straum til folk og kraft til utvikling 

Linja er eitt av dei største nettselskapa i landet, med 282 tilsette som kvar dag arbeider for trygg og stabil straumforsyning på ein berekraftig måte. Selskapet er ei viktig lærebedrift, og har i 2026 18 læreplassar. Gjennom kompetansebygging, drift og utvikling av nettet skal Linja bidra til forsyningstryggleik og langsiktig verdiskaping i lokalsamfunna selskapet er ein del av.

-    Linja har ei sentral rolle i totalberedskapen i samfunnet – noko vi tek på største alvor. Vår viktigaste jobb er å sikre straum til folk der dei bur, og kraft til det nye som skal skapast i regionen. Det skal vi gjere med ansvar for både natur, samfunn og framtidige behov, avsluttar Midtbø.

Styret i Linja godkjente 26. mars 2026 årsrapporten for 2025. Årsrapporten er tilgjengeleg på Linja si heimeside. www.linja.no 

Meir informasjon:
Helge Robert Midtbø adm. direktør i Linja AS, tlf. 907 64 403