Ny minerallov skal styrke næringa

– Dette er eit viktig steg for å styrke ei næring med stort potensial for verdiskaping og berekraftig vekst. Med den nye minerallova får vi eit oppdatert og framtidsretta regelverk som legg betre til rette for utvikling, seier næringsminister Cecilie Myrseth.

Målet med lova er å realisere fleire gode mineralprosjekt som skaper arbeidsplassar og verdiar.

Myndigheitene får no samordningsplikt i mineralsaker. Det vil seie at saksbehandlinga skal bli meir effektiv, og vi skal unngå dobbel utgreiing av dei same problemstillingane.

Lova opnar også opp for nærare reglar for å ivareta nasjonal tryggleik i mineralsaker.

Forskrifta, som blei fastsett 12. juni, utfyller føresegnene i lova og inneheld mellom anna reglar om rapportering og gebyr. Nærare reglar for å ivareta nasjonal tryggleik i mineralsaker vil bli fastsette i eiga forskrift.

– Vi vil gjere det enklare og raskare å få på plass gode prosjekt, gjennom betre samarbeid og smidigare prosessar. Dette er ei viktig næring som regjeringa prioriterer høgt, seier statsråden.

Noreg har dei siste åra styrkt samarbeidet med europeiske land om tilgang til kritiske råvarer. Det er inngått industripartnerskap og samarbeidsavtaler med EU, Canada, Tyskland, Frankrike, Italia og Storbritannia.

Den nye minerallova er eit viktig bidrag til å sikre at Noreg kan spele ei aktiv rolle i det vidare europeiske samarbeidet om kritiske råvarer.

Faktaboks:

• Den nye minerallova trer i kraft 1. juli 2026, og erstatter dagens lov frå 2009.
• Forskrift til minerallova blei fastsett av departementet 12. juni, og trer i kraft samtidig med lova.
• Målet med lova er å få i gang fleire gode prosjekt som skaper arbeidsplassar og verdiskaping, og som også tar vare på omsyn til natur og miljø, grunneigarar og andre som blir påverka.
• Lova innfører krav om betre samordning mellom myndigheitene for å gjere prosessane meir effektive.
• Lova innfører også eit rekkefølgekrav. Det betyr at planprosessen i kommunen må vere avklart før det kan bli gitt løyve til mineralverksemd.
• Det blir innført ei felles ordning for undersøkingsløyve for ulike typar mineral. Søknader skal sendast på høyring tidleg i prosessen, slik at motstridande interesser kan avklarast så tidleg som mogleg.
• Reglane som skal sikre samiske interesser er styrkte. Dei gjeld no for heile det tradisjonelle samiske området i Noreg, ikkje berre Finnmark.
• Lova gir høve til å lage særskilde reglar for å ta vare på nasjonal tryggleik i mineralsaker. Desse kjem i forskrift og blir sende på høyring.

Q&A:

Spørsmål: Når kjem forskriftsføresegner om nasjonal tryggleik?

Svar: Forskriftsarbeidet er i gang i departementet, og planen er å få eit forslag ut på høyring i løpet av hausten. Her er det viktig å sikre at vi legg oss på eit riktig nivå, og at omsynet til føreseielegheit for gitte løyve også blir ivaretatt. Vi må òg sjå dette arbeidet i samanheng med arbeidet med ny lov om investeringskontroll.

Spørsmål: Korleis vil regjeringa sikre rask framdrift i mineralsaker?

Svar: Regjeringa ønsker rask framdrift i mineralsaker, men det må gå hand i hand med grundige og gode prosessar. Erfaring viser at god kvalitet tidleg gir betre prosjekt og meir føreseieleg framdrift.

Grundige prosessar er viktige for å kartlegge konsekvensar, avklare motstridande interesser og sikre omsyn til natur og miljø. Samtidig er det avgjerande å få lokalsamfunnet med og bygge legitimitet gjennom open dialog.

Når desse omsyna blir tekne vare på frå start, blir prosjekta meir robuste og risiko for forseinkingar seinare blir redusert. Samla legg dette grunnlaget for både effektiv framdrift og berekraftig utvikling.

Spørsmål: Kva er målet med internasjonale samarbeid i mineralsaker?

Svar: Målet med samarbeida er å legge til rette for norsk verdiskaping gjennom å fremme nye norske prosjekt i mineralnæringa og industrien. Samstundes skal dei sikre at Noreg er til stades på viktige internasjonale arenaer der avgjerder med betydning for norsk næringsliv blir tatt.

I ein meir uroleg geopolitisk situasjon, der tilgang til kritiske råvarer har blitt viktigare, er slike samarbeid også avgjerande for å styrke forsyningstryggleik og sikre norske interesser i møte med auka internasjonal konkurranse.