Lågare marknadsavgift frå 1. juni

Dei nye satsane blir:

• Konvensjonelle produkt: frå 0,75 % til 0,4 %
• Pelagiske artar: frå 0,5 % til 0,3 %

Endringa er gjort etter innspel frå næringa og ei gjennomført høyring tidlegare i år.

– Reduksjonen gir næringa eit etterlengta pusterom i møte med mellom anna lågare kvotar og auka råvareprisar. Samstundes vil det innebere ei meir målretta prioritering av ressursane i Sjømatrådet, seier fiskeri- og havminister Marianne Sivertsen Næss.

Marknadsavgifta finansierer Norges sjømatråd sitt arbeid med å styrkje etterspurnaden etter norsk sjømat internasjonalt. Styresmaktene vil fortløpande vurdere avgiftsnivået i lys av marknadssituasjonen og behova i næringa.

Om marknadsavgifta for sjømat:

• Marknadsavgifta er ei avgift på eksport av sjømat, rekna ut frå eksportverdien.
• Avgifta blir betalt av eksportørar av sjømat og går til å finansiere Norges sjømatråd sitt arbeid med å auke etterspurnaden etter norsk sjømat gjennom marknadsføring og marknadsinnsikt.
• Avgifta er delt inn i fem kategoriar: laks og aure, kvitfisk, pelagisk fisk, konvensjonelle produkt, samt reker og skaldyr.
• Det er berre avgifta for pelagiske artar og konvensjonelle produkt som no blir justert.
• Døme på pelagiske artar: sild, makrell, lodde, kolmule og makrellstørje.
• Døme på konvensjonelle produkt: saltfisk, klippfisk og tørrfisk.