Nye funksjonar i Gårdskart oppfyller ønskjer frå brukarar

Sidan 2005 har NIBIO si kartteneste Gårdskart vore eit vindauge inn til ei enkel oversikt over arealressursar og arealtal for landbrukseigedommar. Tenesta er mykje brukt av mellom anna bønder, landbruksrådgjevarar og tilsette ved landbrukskontor.

Våren 2025 prøvde utviklarane av Gårdskart noko nytt. Dei gjennomførte ei undersøking der dei oppmoda brukarane til å gi tilbakemeldingar og komma med forslag som kunne gjera Gårdskart endå betre. Responsen var overveldande, med meir enn 1 800 deltakarar.

Dei sette særleg pris på at tenesta er enkel å bruka, gjev rask tilgang til informasjon og god oversikt. Dette er noko NIBIO legg vekt på å ivareta, også når det vert lagt til nye moglegheiter.

Ønskjeliste frå brukarane

Det kom inn mange gode forslag til oppdateringar, og NIBIO måtte velja ut nokre få som fleire hadde på ønskjelista.

– Ein gjengangar var ønsket om å kunna søkja på adressa til eigedomen, ikkje berre på gards og bruksnummer. Dette er no mogleg, forklarar Ingrid Tenge, prosjektleiar og seniorrådgjevar i NIBIO.

– Ein annan etterspurd funksjon var høvet til å kopiera og vidaresenda ei lenkje slik at mottakaren får opp same kart, med same innhald. No er også dette på plass.

Det er òg blitt mogleg å lagra eigedomssøk som gjeld fleire eigedommar. Denne funksjonen er tilgjengeleg ved å logga inn med BankID og lagra på eigen Gårdskart-brukar. Dette er særleg aktuelt for dei som leiger jord frå fleire ulike gardar.

– Oppdateringa har også gjort det mogleg å klikka i kartet og lesa av koordinatar i eit punkt. Dette er nyttig til dokumentasjon eller for å finna att punktet ved hjelp av GPS ute i marka.

Vanskelege ønskje og skjulte funksjonar

Ønskje om å få fram eigaren av ein oppsøkt landbrukseigedom kunne ikkje verta innfridd på grunn av personvernregelverket, GDPR. Namn, adresse og liknande er personopplysningar. Slike opplysningar finst i Grunnboka og er offentleg tilgjengelege, men må handsamast i tråd med regelverket. Det vert stilt andre krav til ei teneste som viser personopplysingar enn til ei open kartteneste.

– Undersøkinga synte også at NIBIO ikkje har nådd godt nok ut til brukarane med alle moglegheitene som ligg i Gårdskart‑tenesta. Fleire av ønskja som kom inn, handla om funksjonalitet som har vore i Gårdskart i fleire år, fortel Tenge.

– Døme er vising av eigedomsgrenser og gards‑ og bruksnummer i nærområdet, vising av delar av ein landbrukseigedom som består av fleire gards‑ og bruksnummer. Moglegheita for å lagra ei teikning og redigera henne seinare, har også vore der i fleire år, opplyser ho.

«Ein dag utan Gårdskart er … meiningslaus!»

Fleire bønder la igjen kommentarar om erfaringane sine med Gårdskart:

«Veldig enkelt å bruka, nyttig verktøy i dagleg bruk, fungerer bra på smarttelefon.»

«Vi er heilt avhengige av Gårdskart på nett ved søknader om arealstøtte, RMP med meir.»

«Ein dag utan Gårdskart er som ein dag utan finn.no. Heilt meiningslaus!»

Nokre bønder ga uttrykk for frustrasjon over mykje skjema og papirarbeid.

Tilsette i kommunal landbruksforvalting var også tydelege i omtala si:

«Gårdskart er heilt uunnverleg i saksbehandlinga i offentleg forvalting. Utan Gårdskart klarer vi ikkje å kommunisera med grunneigarane.»

– Med så mange positive tilbakemeldingar om faktisk bruk og nytte, er me veldig inspirerte til å utvikla karttenesta vidare, avsluttar ein nøgd Tenge.

Utviklarane opplyser at fleire forbetringar allereie vert vurderte, og at nye brukarinnspel vil liggja til grunn for komande oppdateringar også.

Vil du vita meir om ny og nyttig funksjonalitet i Gårdskart, finn du ei god oversikt på nettsida «Nytt i Gårdskart» hos NIBIO. Sida er også lenkja frå søkesida i karttenesta.