Oppretter helsedataavdeling

Føremålet er å samle og forsterke arbeidet til instituttet innan helsedata for dyr, fisk og miljø i Noreg.

– Ved å samle desse faga vil vi kunne bruke helsedata meir effektivt og utvikle nye digitale tenester i vår kunnskapsstøtte til nytte for forvaltninga og bionæringane i Noreg. Den nye avdelinga vil styrke vår dataforvaltning, vår forsking om risiko for smittespreiing og sjukdomsutbrot, våre rapportar om nasjonal helsestatus og annan kunnskapsbasert rådgiving vi gir kvar dag, seier administrerande direktør Gun Peggy Knudsen ved Veterinærinstituttet.

Den nye helsedataavdelinga omfattar om lag 45 forskarar og rådgivarar innan epidemiologi, bioinformatikk, datavitskap og digitalisering ved hovudkvarteret til Veterinærinstituttet på Ås.

Avdelinga får mellom anna ansvar for utvikling og forvalting av kritiske dataanalysar,  inkludert statistikk, visualisering og offisiell rapportering nasjonalt og til EU. Oppgåvene omfattar forsking, interaktive rapportar om sjukdomsutbrot, dataforvalting og bioinformatikk. Arbeidet vil inkludere vidareutvikling av kunnskapsgrunnlaget om smittespreiing og sjukdomsrisiko innan mellom anna lakseoppdrett, ville dyrepopulasjonar og husdyrbesetningar samt sjukdomar som kan spreie seg frå dyr til folk.

– Veterinærinstituttet ønsker med dette å styrke vårt arbeid med helsedata og digitalisering, og løfte korleis vi jobbar ut frå eit éi helse-perspektiv med å avdekke og vurdere risiko for kjende og ukjende sjukdomar. Det er viktige ledd innan nasjonal samfunnsberedskap, seier Gun Peggy Knudsen.

Her finn du det oppdaterte organisasjonskartet for Veterinærinstituttet.