Helge Robert Midtbø startar som ny administrerande direktør i Linja

– Vil bruke dei første månadene på å bli godt kjent med Linja

– Det viktigaste for meg i starten er å bli godt kjent med Linja – strategiane, pågåande saker, økonomien og ikkje minst dei nye kollegaene mine. Eg vil prioritere å reise rundt i heile forsyningsområdet, møte tilsette og få eit best mogleg bilete av drifta.

– Vi har eit stort samfunnsansvar som forvaltarar av kritisk infrastruktur. Stabil drift, høg leveringstryggleik og godt beredskapsarbeid blir derfor heilt sentrale tema framover, særleg med den geopolitiske situasjonen vi står i.

– Linja er eit veldrive selskap, men vi må heile tida utvikle oss i takt med samfunnsutviklinga og forventningane frå kundar, eigarar og tilsette. No har eg gått ut av mine politiske verv for å kunne bruke nødvendig tid og fokus på jobben i Linja.

Prioriteringar og første steg

Midtbø vil bruke den første tida på å bli kjent med organisasjonen, strategiane, økonomien og dei pågåande sakene. Han vil òg reise rundt på dei ulike lokasjonane for å treffe tilsette og få innsikt i drifta i heile forsyningsområdet.

Som andre nettselskap opplever også Linja auka etterspurnad etter kapasitet, og dette blir ein viktig del av utviklingsarbeidet framover.

Styreleiar Erik Espeset er glad for at Midtbø no er på plass

– Styret er oppteke av å vidareføre strategien som er lagt, slik at Linja nyttar ressursane godt, leverer på trygg straumforsyning og held nettleiga så låg som mogleg for kundane. Samtidig skal Linja vere ein attraktiv kompetansearbeidsplass på Nordvestlandet, seier styreleiar Erik Espeset.

Solid bakgrunn frå energi og offentleg sektor

Midtbø er elektroingeniør og har brei erfaring frå energibransjen, industri og offentleg sektor. Han har mellom anna hatt leiande roller i Sunnfjord Energi og Siemens, og kjem no frå stillinga som direktør for drift og eigedom i Helse Førde.

Han har òg hatt styreverv i BKK gjennom sitt politiske engasjement, noko som har gitt han innsikt i energimarknaden og utviklinga av nettselskapa dei siste åra.

Lokal forankring

Han har røtene sine i Svelgen, er busett i Førde men er også ofte i Bremanger der han har hytte.

Om Linja

Linja er det lokale nettselskapet frå Sunnfjord til Sunnmøre. Selskapet har ansvar for å drifte, vedlikehalde og utvikle straumnettet i ein stor region, og er eitt av dei største nettselskapa i landet. Linja spelar ei viktig rolle i den vidare elektrifiseringa og næringsutviklinga i området.

Kontakt:

Erik Espeset, styreleiar – 905 20 033

Christin Aare, fagleiar kommunikasjon – 979 83 962