Situasjonsrapport frå eit tilvere som ikkje er til å halde ut

KOMMUNION
av Lars Norén
NOREGSPREMIERE LAURDAG 31. JANUAR KL. 17.30
SCENE 2

Kva er sjukt og kva er friskt? I Kommunion møter vi åtte menneske i eit rom fylt av dyner. Dei har alle til felles at dei ikkje taklar livet der ute. Dei må skjermast frå det, pakkast inn i dyner. Det blir ikkje sagt, men det blir snart openbert at dei er på ein psykiatrisk institusjon. Kva har gjort at livet deira blei for tungt å bere der ute?

Fellesskap bygd på einsemd

- Människan måste skapa mening, varje dag, även om hon vet att det inte finns någon mening, sa Lars Norén sin gong i eit intervju med Yle.
Kanskje det er dette dei prøver på, dei åtte menneska på denne institusjonen. Eller kanskje det er det dei ikkje får til. Dei prøver i alle fall å skape eit slags liv der inne. Dei snakkar til kvarandre, med kvarandre og forbi kvarandre. Dei lengtar etter nærleik - med kvarandre og menneske der ute. Det er tragisk, det er komisk og det er djupt menneskeleg.
Men dei er. 

Storhending

Det er ei sjeldan storhending innan kunsten når eit verk blir framført etter kunstnarens død. Urpremieren på Kommunion var ved Göteborg Stadsteater i fjor. At Noregspremieren blir ved Det Norske Teatret, er ikkje noka tilfelle. 
Norén og Det Norske Teatret har ei lang historie saman.
Les meir.

Kommunion, som kan tyde "fellesskap" eller "vere saman", er tittelen på eitt av tre stykke som låg igjen på skrivepulten da Lars Norén døydde av Covid19 i 2021. Det er eit sterkt skodespelarlag som skal få bryne seg på teksten, og Anders T. Andersen (Verdiløse menn, Lazarus) står for regien. Han har lenge hatt ein fascinasjon for Lars Norén, men det er første gongen han får sette ein av tekstane hans i scene:
-  Eg trur det første stykket eg såg var Rumäner på Teater Galeasen. Eg fekk heilt bakoversveis.
Les meir.