Medmenneske opnar Olav Duun-året 2026

MEDMENNESKE
av Olav Duun
PREMIERE LAURDAG 17. JANUAR KL. 17.30
HOVUDSCENEN

Medmenneske av Olav Duun har fengsla lesarar i snart eit hundreår som roman, og seinare som teater. I 2026 er det 150 år sidan forfattaren blei fødd. I høve jubileet set Det Norske Teatret opp eit av Duuns hovudverk som stiller nokre evige spørsmål som er like relevante i dag. For stemmer det at alle har det vonde i seg?

På garden Stavsund har dei pensjonerte gardbrukarane Didrik (Geir Kvarme) og Tale (Sigrid Kandal Husjord) tatt plass i kårboligen medan sonen Håkon (Preben Hodneland) og svigerdottera Ragnhild (Ameli Isungset Agbota) har flytt inn i våningshuset i lag med den nyfødde sonen. Dei driv eit kvernbruk i tillegg til den øvrige gardsdrifta, og har så dei klarar seg.

Den vonde

Men gamle Didrik har verketrong og er sjølvrettferdig. Han får det for seg at han skal etablere eit kvernbruk i konkurranse med sonen. For Didrik er alle forhold, også dei familiære, forretningar. Han er villig til å gå over lik for å få "sin rette", som han kallar det. 

Den gode

Svigerdottera Ragnhild på si side, gjer sitt beste for å redde sin eigen og andre sin familie. Ifølge svigermor Tale er ho godheita i eigen person. Ragnhild er sjølvutslettande i gjerninga for å hjelpe dei som treng det, og gjere godt for fellesskapen. Men ho er også både smart og driftig. 

Er det lagnaden, eller er det ein listig plan i det godes teneste som legg snubletrådar for den slue Didriks renkespel? Det vonde drep du ikkje med øks heiter det i Medmenneske. Men Didrik blir drepen, og det med øks. 
Tilbake står den hjartegode Ragnhild, med blod på hendene.

Aktuell i samtida

Medmenneske er lagt til eit trøndersk bondesamfunn mot slutten av 1800-talet, ei tid med store omveltingar. Romanen handlar også om framskritta i bondekulturen og behandlar modernitetens inntog. For regissør Johannes Holmen Dahl er dette av interesse. Dette blir understreka av Erik Hedins komposisjonar som miksar elektroniske lydbilde med fele og Nia Damerells nøkterne kostyme og scenografi. Desse gir gjenklang av fortid, men verkar moderne på same tid.
LES MEIR OM MEDMENNESKE

Olav Duun

Olav Duun (1876 - 1939) er kjend som ein av dei fremste forfattarane våre, og blei hyppig nemnt som kandidat for Nobelprisen i litteratur. Faktisk utropte Aftenposten han feilaktig til vinnar i 1926!.
LES MEIR OM DUUN

Duun-jubileet 2026

I høve jubileet inviterer Det Norske Teatret våren 2026 til samtalar, opplesingar og introduksjonar om forfattarskapen og arven etter Duun.
LES MEIR OM DUUN-JUBILEET

I rollene