Eit godt år for jordbruket i 2024, jordbruksinntekt

Det viser dei årlege driftsgranskingane utført av NIBIO. Driftsgranskingane i jord- og skogbruk er ei rekneskapsgransking som viser resultat og økonomisk utvikling på norske gardsbruk, og er ein del av den offisielle statistikken i Noreg. For 2024 omfattar granskinga tal frå 932 gardsbruk. Desse er valde ut slik at dei representerer ulike landsdelar, storleiksgrupper og driftsformer.

Produksjonsinntektene auka med om lag 15 prosent. Inntektene frå kornproduksjon auka med heile 38 prosent og vart nesten på nivå med det svært gode kornåret i 2022. Husdyrinntektene, som utgjorde halvparten av produksjonsinntektene, auka med 9 prosent. Inntektene frå mjølk, egg og fjørfeslakt auka, medan inntektene frå dei andre husdyra gjekk ned. Tilskota har auka mykje dei siste åra, og også i 2024 viser resultata auke i tilskot. Det var auke både i produksjonstilskot og i pristilskot. I gjennomsnitt utgjorde tilskota 34 prosent av produksjonsinntektene.

Kostnadene auka i gjennomsnitt med 8 prosent. Dei variable kostnadene auka med 3 prosent i gjennomsnitt, men med stor variasjon mellom ulike kostnadspostar. Kostnadene til kraftfôr som utgjer den største posten av dei variable kostnadene, auka med 4 prosent, medan handelsgjødsel gjekk ned med 14 prosent.

Av dei faste kostnadene var det kostnader til avløysing og anna leigd arbeid som auka mest i kroneverdi, med kr 27 300, tilsvarande 15 prosent auke frå året før. Kostnadene til vedlikehald av maskinar og reiskap auka i gjennomsnitt med 21 prosent og maskinleige og leasing auka med 16 prosent frå 2023. Kostnadene til elektrisk kraft auka med 8 prosent, og kostnadene til drivstoff auka med 4 prosent. I gjennomsnitt gjekk dei faste kostnadene før avskrivingar opp med 14 prosent medan avskrivingane auka med 9 prosent.

Arealet per bruk var i gjennomsnitt 438 dekar, 11 dekar meir enn i 2023. Arbeidsinnsatsen auka med 0,1 årsverk til 1,7 årsverk, etter å ha vore på 1,6 årsverk ei årrekke. Avløysar eller anna betalt hjelp utgjorde 0,4 årsverk.