Kampen mot desinformasjon blir styrkt i statsbudsjettet

– I eit stadig meir komplekst medielandskap, er tiltak for å utvikle digital motstandskraft og god kritisk medieforståing, viktige tiltak. Vi er glade for at regjeringa har prioritert auka midlar til dette i neste års statsbudsjett, seier fungerande direktør i Medietilsynet, Hanne Sekkelsten.

Løfte ytringsfridom og kjempe mot desinformasjon

Regjeringa foreslår 37,5 millionar kroner til å løfte ytringsfridommen og kampen mot desinformasjon. 20 av desse er foreslått til Tenk – senter for kjeldemedvit, mens det i tillegg til styrkinga av Medietilsynet med åtte millionar er foreslått fem millionar til oppstart av eit forskingssenter som kan bidra med langsiktig forsking på det offentlege ordskiftet og følgje med på ytringsfridom, polarisering og desinformasjon i Noreg.

Om styrkinga av Medietilsynet, viser Kulturdepartementet til at tilsynet er fagetat for motstandskraft mot desinformasjon. Tilsynet skal bidra med kunnskap til både styresmakter og befolkninga om korleis sosiale medium fungerer. Ei viktig oppgåve i 2026 blir også å førebu tilsynsarbeidet etter forordninga om digitale tenester (DSA).

–  Befolkninga blir i aukande grad påverka av innhald og tenester kontrollert av internasjonale aktørar. Det aukar behovet for informasjon og ein god plan for tilsynsarbeidet, noko som blir spegla i dette budsjettet, seier Sekkelsten.

Auka støtte til undersøkande journalistikk

Regjeringa foreslår auka støtte til Senter for undersøkande journalistikk, Landslaget for lokalaviser og Institutt for journalistikk på til saman 4,5 millionar kroner, for å støtte opp om den undersøkande journalistikken.

Mediestøtta følgjer styringssignala

Løyvingane til dei direkte mediestøtteordningane og NRK blir justert i tråd med dei fireårige styringssignala Stortinget har vedtatt for perioden 2023-2026.  

Totalt blir mediestøtta foreslått, inkludert støtte til medieforsking, auka med 19,2 millionar  til 556 300 millionar  kroner. Løyvinga til NRK er foreslått til 7,76 milliarder kroner. Dette er ei vidareføring av nivået frå 2025, med justering for pris- og lønnsvekst. I budsjettforslaget er det også avsett 150 millionar kroner til avtalen med TV 2 som kommersiell allmennkringkastar.

Mediestøtte (tall i 1000)	2025	2026	Endring	Endring i prosent
Produksjonstilskott	440575	456340	15765	3,6
Innovasjon og utvikling	23690	24540	850	3,6
Samiske aviser	44385	45970	1585	3,6
Lokale lyd- og bildemedier	23850	24700	850	3,6
Medieforskning	4600	4750	150	3,3
Sum	537100	556300	19200	3,6