Blir barna våre oppslukt av "ingenting"?

DEN UENDELEGE HISTORIA
av Michael Ende
PREMIERE LAURDAG 18. OKTOBER KL. 18.00
HOVUDSCENEN

I ei tid da barn les stadig mindre og regjeringa set av penger til eit "leseløft" for dei yngste, slår regissør Peer Perez Øian også eit slag for å bidra til lesegleda og fantasien til dei som er så gamle at mange sluttar å leike, om dei ikkje alt har gjort det. 

Fantasieggande univers

Med Den uendelege historia slår Det Norske Teatret på stortromma for barn, og tek heile Hovudscenen i bruk. I Peer Perez Øians regi blir framsyninga gjennomkomponert av artist Sol Heilo, Arne Nøst har laga ein scenografi som byr på spektakulære scenebilde i samarbeid med videodesignar Åsmund Bøe, og Bianca Deigners fantasirike kostme skapar spennande karakterar. Målet er å opne rom for at barna skal dikte med sjølve:
- Så vi eksperimenterer mykje med det litt abstrakte og antydande. Litt som ei barneteikning som blir levande, forklarar Perez Øian.
Les heile intervjuet.

Til kamp mot "ingentinget"

I Den uendelege historia møter vi mobbeofferet Bastian, som nett har mista mor si. Faren har nok med å takle si eiga sorg, og klarer ikkje vere ein god forelder. Men ein dag kjem Bastian over ei bok, som i teaterversjonen er eit sufflimanus, og blir bokstaveleg talt oppslukt av dette. Der inne møter han fantastiske og fantasirike skapningar som lykkedraken Fuchur og helten Atréju, som skal redde barnedronninga. Riket hennar, Fantásia, er i ferd med å bli slukt av den mystiske krafta "ingentinget" fordi barn i den verkelege verda er i ferd med å miste evna til å fantasere, drøyme og lage historier. Bastian blir venn med Atréju, og saman kjempar dei for å redde både dronninga og Fantásia.

Ina Svenningdal spelar hovudkarakteren Bastian, som etter kvart blir fortapt i si eiga fantasiverd og vender seg mot vennen Atréju og sårar han.
- Bastian blir faktisk radikalisert, seier regissøren.
- Men heldigvis blir han også redda av vennene, som gir verdsbildet hans motstand.

Klassikar i barnelitteraturen

Den uendelege historia er opphavleg ein roman, skriven av Michael Ende og utgitt i 1979. Ho blir rekna som ein klassikar innan barne- og ungdomslitteraturen. Boka blei filmatisert i 1984 av Wolfgang Petersen, og tittelsongen av den britiske artisten Limahl, blei ein monsterhit. No blir boka nok ein gong filmatisert i Hollywood, men først skal ein ny teaterversjon nå ut til norske barn.