Kva gjer du om du får ein pukkellaks på kroken?

I ei tid med historisk strenge fiskereglar er det mange som nyttar høvet til å fiske den uønskte pukkellaksen. Når du fiskar så plikter du å rapportere all fangst av pukkellaks, laks, sjøaure, sjørøye og oppdrettslaks. Dette gjeld også gjenutsett fisk.  

Det er særleg i Finnmark og enkelte andre område i Nord-Noreg at pukkellaksen no dukkar opp i stort tal, både i sjø og elv. Her er det størst sjanse for å få han på kroken og dermed også viktigast å vite kva ein skal gjere.  

– Det er positivt at folk fiskar pukkellaks, men det følgjer også med eit ansvar.  Om du får ein pukkellaks, skal du aldri sleppe han ut i vatnet igjen. Den skal takast opp, blir avliva på ein rask og human måte, og så blir rapportert. Dette gjeld anten du fiskar i elv eller sjø, seier direktør i Miljødirektoratet, Hilde Singsaas.  

Du kan lese meir om reglane for laksefiske og korleis ein rapporterer frå fiske i desse rettleiarane frå Miljødirektoratet:    

Når og kvar kan eg fiske laks, sjøaure eller sjørøye? - miljodirektoratet.no 

Rapportere frå fiske etter laks, sjøaure og sjørøye - miljodirektoratet.no

Korleis skilje pukkellaks og villaks 

Miljødirektoratet registrerer auka interesse for pukkellaksefiske, også blant dei som ikkje fiskar så ofte. Mange nyttar sommaren til å teste fiskelykka, utan nødvendigvis å kjenne til regelverket eller korleis ein skil ulike artar frå kvarandre. 
 
Det kan vere vanskeleg å sjå forskjell på pukkellaks og villaks om du ikkje har sett deg inn i det på førehand. Det viktigaste kjenneteiknet på pukkellaks er dei mørke flekkene på halefinnen. Pukkellaks som har stått i elva skil seg klart ut frå atlantisk laks. Når det nærmar seg gyting får hannen også ein tydeleg pukkel på ryggen, og utviklar krokforma kjeve og tydelege tenner.

Gjer viktig oversikt  

Fiske etter pukkellaks følgjer i utgangspunktet dei same reglane som for laks, sjøaure og sjørøye. Det betyr at både reiskapstypar og fisketider er regulerte for å verne sårbare bestandar av dei naturlege artane av villaks. I 2024 kom det berre om lag 323 000 villaksar tilbake til Noreg frå havet for å gå opp i elvane. Til samanlikning vart cirka 580 000 pukkellaksar fanga eller observerte i norske elvar i 2023. 

Rapportering av pukkellaksefangst gir styresmaktene oversikt over kor mykje pukkellaksar som blir tekne opp, og der ho blir fanga. Dette er avgjerande for å kunne vurdere effekten av tiltak og planleggje vidare innsats for å hindre at arten etablerer seg i norske elvar. 
 
Staten har allereie sett i gang omfattande tiltak for å avgrense spreiinga av pukkellaks. I tillegg til feller og uttak i over 60 elvar, speler også privatpersonar ei viktig rolle i arbeidet med å få bukt med arten. 

– Vi er glade for at så mange engasjerer seg. Når folk tek opp og rapporterer pukkellaks, bidreg dei direkte til å verne norsk natur. Det er eit viktig bidrag i kampen for å bevare villaksen, seier Singsaas.  

Hugs å betale fiskaravgifta  

Sjølv om du fiskar etter pukkellaks, gjeld dei same reglane som for andre laksefiske. Om du fiskar i eit lakseførande vassdrag, må du betale den statlege fiskaravgifta. Eit vassdrag blir rekna som lakseførande opp til ein foss eller eit anna naturleg hinder som laksen ikkje kan passere. 

I tillegg må du kjøpe lokalt fiskekort. Dersom du ønskjer å fiske pukkellaks utanfor ordinær fisketid i vassdrag, må du ha løyve frå Statsforvaltaren. Eit slikt løyve vil innehalde eigne vilkår for fisket.    

Les meir om pukkellaks her:  

Pukkellaks