Fun-facts om jordbruket i DITT herad – Møre og Romsdal: Sjekk NIBIOs Arealbarometer og sjå korleis ditt herad gjer det på landbruksfronten!

Stranda: Størst på geit i heile Noreg 

Eksempel frå Stranda: Sjølv om geita passar godt inn i norsk natur, er det lite geit i Noreg samanlikna med sau og kyr. Men i Stranda er det gode sjansar for å treffa på geiter i sommar, for heradet ligg på førsteplass på geitestatistikken i Noreg. Her bur det 1840 geiter. På andre- og tredjeplass kjem Balsfjord i Troms og Aurland i Vestland. I heile Noreg er det om lag 44 700 geiter. Ca. 5200 av dei bur i Møre og Romsdal. Vestland fylke er det største geiteheradet med over 10 700 geiter.  

I Stranda bur det dessutan om lag 2200 vinterfôra sauer (talet inneheld i hovudsak mordyr/søyer og ikkje lam), 625 mjølkekyr, 159 ammekyr og 1134 avlspurker (tal frå 2024).  

Stranda har 18 397 dekar jordbruksareal. Det er 2,1 prosent av arealet i kommunen. Nesten alt saman vert nytta til å dyrka gras til husdyr. 26 prosent av kommunen er dekt med skog og over halvparten er såkalla snaumark, areal med låg eller lite vegetasjon som til dømes areal over tregrensa. Under ein prosent av arealet i Stranda er nytta til bygg og samferdsel.  

Fleire viktige jordbruksherad i Møre og Romsdal 

Møre og Romsdal har fleire viktige jordbruksherad. Hustadvika er heradet med mest jordbruksareal i fylket med 81 027 dekar. Hustadvika er dessutan ein storkommune når det gjeld mjølkeproduksjon og kjem på femteplass i heile landet for tal mjølkekyr. Molde har nest mest jordbruksareal i Møre og Romsdal med 46 753 dekar. I andre enden kjem Sula med berre 2791 dekar.  

Finn tal for heradet ditt - supert agurkstoff i sommar-månadane 

Tal for din kommune finn du i NIBIO sitt Arealbarometer, ei skattekiste med lett tilgjengeleg statistikk om landbruk og skogbruk i ditt herad, ditt fylke og for heile landet. Her kan du finna nøkkeltal framstilt på ein lettfatteleg og oversiktleg måte. Mange av tala er og illustrert med enkel grafikk. Samanlikn med naboherad eller med tal for fylket og heile landet!  

• Kor mykje skog, jordbruksareal og nedbygd areal er det i dit herad? 

• Kva vert dyrka og kor mange husdyr finst det i heradet ditt?  

• Kva er kvaliteten på jorda (tilgjengeleg i om lag 50 % av landet)? 

• Kor mykje jord kan dyrkast opp til nytt jordbruksareal i heradet ditt? 

• Verdiskaping i jordbruket (berre tilgjengeleg for utvalde fylke).  

Meir informasjon om arealbarometeret: https://www.nibio.no/tema/jord/arealressurser/arealressurskart-ar5/arealbarometer 

Arealbarometer for Møre og Romsdal fylke: https://arealbarometer.nibio.no/nb/fylker/moere-og-romsdal/ 

Ønsker du tilgang til regnearket me har nytta for å samanlikna herad frå heile landet? Send forespørsel til: hege.ulfeng@nibio.no