NVE tilrår tiltak for å ivareta fisken i Finndølavassdraget

Arendals Vasdrags Brugseierforening (AVB) fekk løyve til å regulere Finndølavassdraget i 1961. No har NVE behandla vilkårsrevisjonen for vassdraget. Krava om revisjon kom frå Fyresdal og Valle kommunar, og gjeld først og fremst heilårleg minstevassføring i elva, og minste sommarvasstand i det største magasinet, Torsdalsmagasinet.

Det største kraftverket i reguleringsområdet er Finndøla kraftverk. Kraftverket produserer rundt 307 GWh straum i året. Dette er det årlege forbruket til om lag 15 000 hushald.

NVE tilrår også at målepunktet for vassføringa flyttast, noko som gir AVB betre styring og kraftproduksjonen kan auke med inntil 3 GWh årleg. NVE meiner dette gjer betra forhold for både miljø og kraftproduksjon.

Minstevassføring i Bondøla vil skape gode forhold for gytinga og oppveksten til fisken

Bondøla er eit av dei største sidevassdraga til Finndøla, og er gyteområde for auren som lever og veks seg stor i Fyresdalsvatnet på sommaren. Også siken i Fyresdalsvatnet har gytevandring opp i Bondøla. Minstevassføringa som NVE tilrår krav om, vil gje betre forhold for fisk, men også for botndyra i elva.  

–Konsesjonen frå 1970 inneheld krav om minstevassføring, men berre om sommaren. På vinteren kan Bondøla bli heilt tørrlagt. Av omsyn til auren, sik og botndyr tilrår derfor NVE ei heilårleg minstevassføring, seier Carsten Jensen, seksjonsleiar i NVE.

NVE meiner at tiltaka vil bidra til å nå miljømåla for rørde vassførekomstar. NVE meiner magasinrestriksjonar vil føre til ulemper for kraftverket i form av redusert fleksibilitet og regulerbar kraft. Disse ulempene er større enn fordelane som restriksjonane kan ha for miljø, landskapsbilete og friluftsliv. NVE tilrår derfor ikkje magasinrestriksjonar.

NVE tilrår støtte til lokalt villreinfond

Reguleringa av vassdraget påverkar villreinen. NVE tilrår derfor at AVB betaler 2 millionar kroner til villreinfondet for Setesdal Austhei. Pengane vil kunne bidra til undersøkingar og tiltak for å bevare villreinen i området.

Med revisjonen blir også nye standardvilkår om naturforvaltning innførte. Dei nye standardvilkåra gir styresmaktene rett til å pålegge AVB undersøkingar og tiltak for betre miljøforhold i vassdraget.