Kva om KI tek over verda?

PROSESSEN MOT MENNESKA
EIt konsept av Perez/Hasmo
URPREMIERE LAURDAG 29. MARS KL. 18.30
SCENE 2

Vi menneske har skapt KI for å gjere liva våre lettare, meir effektive, berekraftige, ja rett ut lykkelege. Men no har KI blitt smartare enn oss. Og KI ser at menneska er irrasjonelle, kjenslestyrte og ikkje klarer å leve etter sine eigne ideal. Dei snakkar om miljøvern og fred, men det dei gjer, er å øydelegge jorda, sette kortsiktig vinning og profitt framfor omsyn til miljø og andre menneske.

Ei handling av kjærleik

KI er rasjonell, og Omnitron har gjennom år lytta til og observert menneska, og stille kalkulert. Omnitron ser at menneska er den største trugselen mot jorda, og må utslettast i si noverande form. Dei er skyldige i krigar og forureining, utrydding av dyr og natur. Det einaste rasjonelle er å fjerne menneska for å redde kloden. Dei kan imidlertid bli opplasta til ein skyversjon. Dette meiner Omnitron er ei handling av kjærleik.

Dommen er falle, men i ein siste rettssak skal menneska få høve til å forsvare seg.

Teknofilosofisk teater

Prosessen mot menneska stiller seg i ein lang tradisjon innan science fiction. Regissør Peer Perez Øian og dramaturg Anders Hasmo har spesielt late seg inspirere av Karel Čapeks teaterstykke Rossums Universelle Robotar, forkorta R.U.R., frå 1920 i arbeidet med framsyninga. Med R.U.R fann Čapek faktisk opp omgrepet "robot". Les meir om R.U.R.

Framsyninga reiser ei rekke teknofilosofiske spørsmål. Kva skjer for eksempel om vi må stå til rette for vårt eige skaparverk? Bør menneska bli utrydda? Kva betyr det å vere menneske?

Prosessen mot menneska tek form som ei interaktiv framsyning, der publikum står på tiltakebenken i lag med skodespelarane, og får høve til å stille spørsmål til eller forsvare seg overfor Omnitron.

Ny teknologi og teater

Prosessen mot menneska er ein del av Creative Europe-prosjektet ACuTe, som har som mål å utforske og undersøke scenekunstproduksjon der ein nyttar nyskapande teknologi og forskar i nye samarbeidsstrukturar mellom scenekunstnarar og innovative tekniske miljø. Det Norske Teatret har forska i kategorien «ny dramaturgi» og framsyninga har blitt til i samarbeid med teknologibedrifta Net Nordic.

Spørsmålet dei ville finne svar på med prosjektet som har blitt Prosessen mot menneska var:
Kva tyder det å vere menneske i møte med ny teknologi? Les heile artikkelen til dramaturg Anders Hasmo om prosessen mot Prosessen mot menneska her.

Vi må snakke om KI!

I samband med framsyninga vil det også bli gjennomført ein serie arrangement der Det Norske Teatret i samarbeid med NetNordic set fokus på ulike aspekt ved kunstig intelligens som teknologisk og sosio-kulturelt fenomen.