155 millionar til meir effektive og miljøvennlege hamner

– Regjeringa vil styrke kysten og sjøtransporten. Statleg støtte til investeringar i hamneinfrastruktur er avgjerande for å få realisert gode prosjekt som elles ikkje ville blitt gjennomførte. Effektive og miljøvennlege hamner er viktige for næringslivet som er avhengig av trygg og effektiv transport til og frå marknaden, seier fiskeri- og havminister Marianne Sivertsen Næss.

Tilskotsordninga for effektive og miljøvennlege hamner blir forvalta av Kystverket, og har vore i drift sidan 2019. Ordninga gir økonomisk støtte til investeringar i både fysiske anlegg og digitale løysingar, og har som mål å fremje grøn omstilling i transportsektoren og styrkje sjøtransporten si rolle i det nasjonale transportsystemet.

Då søknadsfristen gjekk ut 26. februar, hadde Kystverket mottatt 19 søknader om støtte for til saman meir enn 300 millionar kroner. Etter ei grundig vurdering får no ni prosjekt støtte på til saman 155 millionar kroner.

Prosjekta som får støtte er spreidde over store delar av landet, frå Oslo og Kristiansand til Ørland og Bodø, og omfattar mellom anna digitalisering, oppgradering av kaier, betre tilkomstvegar og mudring for å redusere ventetid og auke kapasitet.

Prosjekt som får støtte (beløp eks. mva):

Søkar	Tilsagn	Type prosjekt
Harstad havn KF	5 266 800	Tilkopling til digital plattform for betre samhandling og effektiv utnytting av infrastruktur
Bodø havn KF	3 990 000	Tilkopling til digital plattform for betre samhandling og effektiv utnytting av infrastruktur
Ørland kommune	54 287 000	Mudring og oppgradering av kai og bakareal ved Uthaug hamn
Føresvikvegen 40 AS	28 210 730	Utviding av kaifront og etablering av roro-rampe ved Føresvik i Bokn
Kristiansand havn IKS	37 440 582	Oppgradering av tilkomstveg ved Ringknuteodden
Moss havn KF	4 348 000	Installasjon av smart gate-system for betre adgangsstyring
Oslo havn KF	8 000 000	Oppgradering av Tankskiputstikkeren med betre fendring og konstruksjonar
Oslo havn KF	4 144 000	Kartlegging av djupnedata i fleire hamner over heile landet
Yilport Oslo Terminal Investments AS	9 792 848	Oppgradering og utviding av smart gate-løysing
Totalt	155 479 960

I Nasjonal transportplan 2025-2026 varsla regjeringa at tilskotsordninga skal gjennomgåast for å rette ordninga endå meir inn mot grøn omstilling. I planperioden er det føreslått å setje av 125 millionar kroner årleg til ordninga.

Bakgrunn:
Tilskotsordninga kan delfinansiere investeringar i hamneinfrastruktur, tilgangsinfrastruktur og mudring – tiltak som ofte ikkje let seg gjennomføre utan statleg støtte. Det kan givast tilskot på inntil 80 prosent av støtteberettiga kostnader, avgrensa til det som er nødvendig for å realisere prosjektet. Hamneanlegg som får støtte, må vere offentleg tilgjengelege.