Sjekk ut friluftslivsperler i nærområdet ditt

– Vi vil at alle skal kunne komme seg ut i naturen, og då er det viktig at det er lett å finne informasjon om turmoglegheiter. No er fleire av dei flotte statleg sikra friluftsområda våre tilgjengeleg på Ut.no, der ein kan finne gratis turtips for heile landet, seier klima- og miljøminister Andreas Bjelland Eriksen.

Sidan 1950-talet har staten samarbeidd med kommunar og friluftsråd om å ta vare på og leggje til rette friluftslivsområde for allmenta. Totalt er om lag  2300 område sikra gjennom denne ordninga.

No er  eit utval av desse områda lagt inn i løysinga til Ut.no, der du enkelt kan finne friluftslivsperler nær der du bur eller i område du skal besøkje.

– Noreg har så mange  flotte friluftslivsområde. Det er Friluftslivets år, sommarferien er rett rundt hjørnet, og anten folk føretrekkjer eit roleg naturområde eller vil besøkje eit populært og godt tilrettelagt område, er det mange moglegheiter rundt omkring i landet. No håpar  vi endå fleire vil få auga opp for desse friluftslivsområda, seier Hilde Singsaas, direktør i Miljødirektoratet.

 – No gjer vi det endå enklare å finne fram til dei gode og nære naturopplevingane, anten du vil ta deg eit friskt bad, klatre opp på ein lokal topp, eller ete lunsjen ute i eit nytt turområde. Vi er så heldige her i landet at det aldri er langt til fantastiske friluftslivsområde, og det vil vi vise fram til fleire, seier Tor Kåpvik, konstituert generalsekretær i Den Norske Turistforening (DNT).

Finn ein tilrettelagd tur på Ut.no Ut.no - Heile Noregs turplanleggjar | Ut.no
Vel “Turmål” og huk av for “Friluftsområde” for å finne områda. 

Tilrettelagt friluftsliv for fleire

Ut.no er Noregs mest brukte turplanleggjar med 5,7 millionar aktive brukarar gjennom det siste året. Turplanleggjaren lèt deg sjå kart, finne turar, registrere besøk og finne overnattingsstader. No har Miljødirektoratet og Ut-redaksjonen samarbeidet om å gjere informasjon om eit utval statleg sikra friluftslivsområde lettare tilgjengeleg for allmenta.

I første omgang er 200 statleg sikra friluftslivsområde lagde inn i UT.no, men lista over område vil supplerast fortløpande. Det er fylkeskommunen, kommunar og friluftsråd med drifts- og tilsynsansvar som vel ut område.

Blant område du no kan finne meir informasjon om i Ut.no er: det nydelege kystområdet Mærrapanna i Fredrikstad, idylliske Vikaengene ved Selbusjøen i Selbu, og den populære badeplassen Storvika i Stjørdal.

Tek vare på friluftslivsområde for framtida

Målet med statleg sikring av friluftslivsområde er å ta vare på viktige område og forvalte dei slik at dei er tilgjengelege og attraktive å bruke. Slik vil fleire få gode høve til friluftslivsopplevingar og -aktivitet.

Les meir om ordninga her: Statleg sikra friluftslivsområde - miljodirektoratet.no

Kvart år kan kommunane søkje Miljødirektoratet om å bidra til sikring av friluftslivsområde som dei vil ta vare på for framtida. Høgt prioritert er område og ferdselsårar som er nærte der folk bur og tilgjengeleg for mange brukargrupper, og areal i strandsona ved kysten eller ved vatn og vassdrag.

Søkje om statleg sikring av friluftslivsområde? Sjå rettleiaren vår: Søkje om statleg sikring av friluftslivsområde - miljodirektoratet.no