NVE vurderer at Nye Tussa kraftverk ikkje krev ny konsesjon

Tussa Energi har allereie konsesjon til å drive kraftverket Tussa på Bjørke i Volda kommune. Dagens kraftverk er over 60 år gamalt, og står overfor omfattande vedlikehaldsarbeid i tida framover. Tussa Energi ønsker derfor å bygge eit nytt kraftverk. Etablering av Nye Tussa kraftverk vil auke installert effekt frå dagens 56 MW til 150 MW. Den årlege produksjonen vil auke med om lag 8 GWh, som svarar til straumforbruket til 400 husstandar.

Tussa Energi har bedt om konsesjonspliktvurdering

Tussa Energi ønsker å bygge eit nytt kraftverk innanfor den eksisterande konsesjonen. Prosjektet inneber at Tussa Energi vil bygge ny kraftstasjon, ny maskinhall og nye vasstunnelar. Det nye kraftverket vil ikkje endre vassføringar i elvestrengar, eller høgaste og lågaste regulerte vasstand i Tyssevatnet.

NVE har vurdert om tiltaket kan føre til nemneverdig skade eller ulempe for allmenne interesser i vassdraget i ei slik grad at tiltaket må ha ny konsesjon. Ei konsesjonspliktvurdering gir verken løyve eller avslag til sjølve tiltaket, men avklarar vidare saksgang.

Bygging av Nye Tussa kraftverk krev ikkje ny konsesjon

Ein auka effekt i Tussa kraftverk gjer det mogleg å tilpasse produksjonen til forbruket i samfunnet og etterspørselen i kraftmarknaden. Det endra køyremønsteret vil føre til at vasstanden i Tyssevatnet vil svinge meir enn tidlegare. Vasstandsendringane synest likevel å vera for små til å ha nemneverdig negativ påverknad for fisk. Sidan det svært sjeldan er overløp over dammen i dag, vil tiltaket heller ikkje gje endringar i vassføringa i elva Tyssa mellom Tyssevatnet og fjorden.

–Då vi vurderte konsesjonsplikt, var konsekvensane av effektkøyring og svingingane i vasstanden som det fører til det mest sentrale temaet. Dagens konsesjonen har allereie vilkår som gir myndigheitene høve til å pålegge Tussa Energi å utføre undersøkingar for fisk. I tillegg gir den NVE moglegheit til å følge opp planlegging, bygging og drift av anlegget. Vi meiner derfor at Nye Tussa kraftverk kan byggast innanfor den eksisterande konsesjonen, seier Håkon Berg Sundet, fagleiar i NVE.