Reparerer søkkehol og fjernar vegetasjon

– Måndag denne veka oppdaga me eit søkkehol i vegen i Osgjelet. Eit køyrefelt har vore sperra av sidan då, og slik at ikkje bilar skal køyra i holet eller belasta skaden på vegen, seier byggjeleiar Morten Ørbech Mo i Statens vegvesen.

Må først ta det som er under vegen

Denne skaden er eit døme på at ein først må vøla det som er under vegen, før ein byrjar på sjølve vegbanen. Viss ikkje vert det som å setta eit plaster på eit brekt bein.

– Massar under vegkroppen er vaska ut under asfalten. Me vil difor starta med å oppretta ei stikkrenne, som er eit rør som leiar vatn under vegen. Me må og ta ned og reetablera muren på nedsida av vegen, før me ordnar sjølve holet. Arbeida er venta å ta to-tre veker.

Ein jobb til

Samstundes startar Vegvesenet med grovreinsk og vegetasjonsfjerning av skjeringa frå Vinje til litt forbi Myrkdalstunnelen. Denne jobben vil ta 4-5 veker. Denne jobben vil fjerna lause element i skjeringa og tre som kan koma ned frå skjering og skjeringskant.

Dette betrar trafikktryggleiken og bidreg til Statens vegvesen sin nullvisjon for drepne og hardt skadde i trafikken.

Slik blir trafikkreguleringa

Arbeidstida er klokka 20.00-07.00, og jobben skal etter planen vera ferdig til 30. juni.

Arbeidet er lagt til natta for å minimera ulempene for trafikantane. Det er på denne tida av døgeret det er minst trafikk.

Jobben i området krev at Vegvesenet delvis er nøydde til å stengja vegen heilt, for arbeidarane sin tryggleik.

Rv. 13 i området blir difor stengd frå klokka 20.00-00.00 med gjennomslepp av trafikk kvar heile time. Deretter blir det stengt 00.00-02.45 og 03.00-05.45. Stengetidene vert tilpassa kollektivtrafikk og stengeregimet for arbeida ved Kvarmakløvet. Utrykkingskøyretøy får passera.

Følg med på 175.no eller appen Vegvesen trafikk for oppdaterte trafikkmeldingar til ei kvar tid.

– Respekter skilt og lysregulering. Alle kan verta utolmodige på grunn av venting, men trafikkreguleringa handlar om noko som er mykje større enn det: Nemleg alle sin tryggleik, avsluttar Morten Ørbech Mo.