HEKATE slepper "Nordavinden" – siste singel før debutalbum med norsk folkemusikk i hekseklede

LYTT HER

Hekate (NO) er ein vokaltrio beståande av Malin Alander, Silje Risdal Liahagen og Synnøve Brøndbo Plassen, tre songarar som alle har utmerka seg som soloartistar på den norske musikkscena. Dei slepp sitt debutalbum Evigheten forestår på Grappa/ Heilo 13. juni 2025, med Martin Langlie som produsent. 

Slåttetralling har lange tradisjonar her i Norge, og etter mange år som ein mindre omtalt del av folkemusikken, har denne undersjangeren fått sin renessanse dei siste tiåra. Albumet består av slåttetralling frå ulike delar av landet, med improvisasjon som eit av hovudelementa. Dei tre stemmene i trioen er både ulike og like, noko som bidreg til å skape eit dynamisk lydbilete med eit breitt spekter av klang. 

Hekate oppstod frå eit ynskje om å lyfte fram slåttetralling, og ein klar visjon om songen som sjølve ryggraden i dansefesten. Med mål om å lage euforisk stemning for både dansaren og lyttaren, har dei skapt sitt eiget univers styrt av drivande samspel og intens energi. 

Om ein legg til inspirasjon frå den kraftfulle, feminine energien som historisk fylgjer slåttetrallinga og det sterke samhaldet som er i samsongen, sit ein att med eit potent heksebrygg av kompromisslaus kveding i klubbsetting. 

"Nordavinden" er eit møte mellom to ulike lydlandskap, ein tradisjonell springleik og ei gamal salmetone. Salmen er skrive av Dorothe Engelbretsdatter på midten av 1600-talet, og springleiken er laga av den kjende felespelaren Fel-Jakup som låg og høyrde nordavinden suse i natta gjennom eit utett tak. Salmen skildrar sjølve enden av livet på jorda, der alt går mot den lange natt.