Her skal Vegvesenet hindra flaum i framtida

Ei stikkrenne er eit rør som leiar vatn under vegen.

– Dette er ein plass me stadig opplever at det flaumar over ved store nedbørsmengder, så no aukar me dimensjonen på stikkrenna, seier byggjeleiar Heidi Strandos i Statens vegvesen.

Arbeidet som skal utførast er skift av stikkrenne, det sprengjast ut for bekkeinntak, samt masseutskifting på delar av vegen. Betongrekkverket må ned, og det skal etablerast nytt rekkverk.

Dette er eit omfattande arbeid.

Vegen vert difor stengd natt til tysdag, onsdag og torsdag klokka 23.00-05.30.

På dagtid vert det lysregulering og kanskje manuell dirigering.

– Å skifta ei stikkrenne er ein del av det kontinuerlege arbeidet Statens vegvesen gjer for å syta for at riks- og europavegane er klare for å ta imot både dagens og morgondagens trafikk. Å ha fungerande stikkrenner er viktig for å unngå oversvømming av vegen, noko som er ein del av dette samfunnsoppdraget, legg Strandos til.

Statens vegvesen ber trafikantane på det sterkaste om å respektera trafikkdirigeringa.

– Vi har forståing for at venting kan vera frustrerande. Men hugs då på at dette er ein del av noko som er uendeleg mykje større enn ein sjølv og eins eige utolmod der og då. Det handlar om trafikktryggleiken for oss alle, både trafikantene og dei som jobbar på og langs vegen for at han skal vera sikker og framkomeleg ikkje berre i dag, men også i morgon. Og det er nettopp det drift og vedlikehald av vegnettet handlar om, avsluttar Strandos.