Opnar for noko sjølaksefiske i Finnmark

– Situasjonen for villaksen er kritisk, og vi er i ferd med å miste noko av det som gjer oss til Noreg. Når situasjonen er så alvorleg, må vi gjere det som er nødvendig. Eg er likevel glad for at vi kan opne for noko fiske, seier klima- og miljøminister Andreas Bjelland Eriksen.

– Av omsyn til laksen i verdas kanskje viktigaste lakseelv, Tanavassdraget, er det nødvendig med sterke avgrensingar på fisket etter laks i sjø i heile Finnmark. Etter nye vurderingar har vi likevel funne moglegheit for å opne for noko laksefiske i sjøen i delar av Vest-Finnmark, seier direktør for Miljødirektoratet, Hilde Singsaas.

• Sjå dei nye føresegnene for laksefiske i sjø, vedlagt denne pressemeldinga. 

• Les om korleis Miljødirektoratet regulerer laksefisket

• Sjå oppsummering og vurdering av høyringsinnspela som kom då Miljødirektoratet tidlegare i år sende ut forslag om nye føresegner for laksefiske i sjø og vassdrag,  vedlagt denne pressemeldinga.

Skånar Tana-laksen med seinare fiskestart 

Tanalaksen bevegar seg over store delar av finnmarkskysten, før den går opp i elva for å formeire seg. I januar sende Miljødirektoratet ut eit forslag på høyring, som innebar null fiske etter laks i sjø i Finnmark frå og med i år. Etter innspel som kom i høyringsrunden opnar direktoratet no likevel for laksefiske frå 10. juli i fjordane frå Hammerfest og vestover i Vest-Finnmark, og dessutan frå 15. juli i Porsangerfjorden. Begge stader varer fisket fram til 4. august.  Aust for Porsangerfjorden blir det ikkje opna for noko laksefiske i sjø frå og med i år. 

– Undersøkingar viser at Tana-laksen i midten av juli har forlate Vest-Finnmark og sumt austover mot Tana. Laksen som då er igjen i Vest-Finnmark høyrer heime i elvane der, og tilhøyrer bestandar som er mindre sårbare enn Tanalaksen. Dei toler derfor betre å bli fiska på, seier miljødirektør Hilde Singsaas. 

Fleire innstrammingar kan bli nødvendig 

Det mest omfattande sjølaksefisket vi har i Noreg er i Namsfjorden i Trøndelag. Her blir fiskestarten utsett med fem dagar, til 15. juni. Den vekefaste fisketida blir her redusert med ein firedel samanlikna med i dag, og vil gå føre seg måndagar til torsdagar i perioden 15. juni til 1. juli. I Kvænangen i Troms og i Eidsfjorden i Vestland blir fiskestart utsett med høvesvis fem og sju dagar. Begge stader startar fisket 15. juli frå og med i år. 

– Den gongen dei gjeldande føresegnene for laksefisket vart innførte var det langt meir laks som kom tilbake til kysten frå havet enn det er no. Det er derfor behov for å redusere fiska. Dei tre dårlegaste lakseårene historisk sett har vore i perioden etter 2021, seier Hilde Singsaas. 

I fjor måtte Miljødirektoratet på kort varsel stengje laksefisket mange stader. Endringane i føresegnene om laksefisket i år har til hensikt å gjere sesongen meir føreseieleg for både fiskarar og næringsdrivande. Likevel kan det også i år bli nødvendig med fleire innstrammingar i løpet av sesongen, dersom det kjem endå færre laks enn venta.

– Når laksen forsvinn, forsvinn også kulturen og tradisjonane knytte til den. Vi må snu den negative utviklinga for villaksen, slik at vi også kan sikre at kystkulturen og sjølaksefisket kan førast vidare til nye generasjonar, seier klima- og miljøminister Andreas Bjelland Eriksen. 

Les også: 

Det mest avgrensa elvelaksefisket i historia vedteke - miljodirektoratet.no 

Foreslår det mest avgrensa laksefisket i historia - miljodirektoratet.no