Øyonn Groven Myhren og Marit Karlberg: Å synge hardingfeleslåttar - TOSTEMT

LYTT HER

Øyonn Groven Myhren og Marit Karlberg løftar fram slåttar og viser i tostemt drakt. På Tostemt, som er ute i dag, får vi tretten tralleslåttar og danseviser frå Telemark og Valdres, vidareutvikla og arrangert for to stemmer. Øyonn og Marit fortel:

– Me er begge djupt fascinerte av det tostemde som ligg i mykje av felespelet, særleg i hardingfelelæte. Det er ofte som om to sjølvstendige melodilinjer spelar saman. Når me arrangerer for tostemt tralling, er hardingfeleuttrykket ei viktig inspirasjonskjelde.

Slåttane på albumet er overleverte dels gjennom spel, dels gjennom tralling. For å syna mangfaldet i den sungne dansemusikken, tek dei med fem viser i bygde- og runddanstakt. Nokre av desse er instrumentalmelodiar som nokon har sett tekst til, og her let dei langeleik og lyre følgja songen. Dei avsluttar:

– I arbeidet med å leggja tralleord på slåttane, kjem me stadig attende til den frodige skogen av kjaftespelarar. Tralleslått-tilfanget har stor eigenverdi, og nemningane er mange. I Telemark "tullar dei slåttane", i Valdres "hullar dei låttane", og i Hallingdal "lèt dei på kjafte". Mange av dei gamle trallarane held fast ved eit alderdommeleg lag av slåttemusikken. Og her er eit hav av melodiske vendingar, former, rytmikk, stemmebruk og tonale uttrykk.

Albumet er spelt inn i Høvik kyrkje av teknikar Tor-Magne Hallibakken og produsert av Leiv Solberg.

Om Øyonn og Marit

Øyonn Groven Myhren (1969) – vokal og lyre
Marit Karlberg (1967) – vokal og langeleik

Øyonn Groven Myhren og Marit Karlberg var sentrale i vokalgruppa Dvergmål, som gav ut platene “Visor og kvæde frå Blåberglandet" (Grappa, 1996) og "Song i himmelsalar" (Heilo/Grappa, 2004), den fyrste Spellemann-nominert. 

No, over 25 år seinare, har dei to tatt opp att tråden, og videreutvikla slåttemusikk frå Telemark og Valdres i vokalt duoformat. Dei har også funne fram eit knippe danseviser som dei syng med lyre- og langeleikspel til.

Øyonn Groven Myhren og Marit Karlberg er av våre fremste kvedarar med ei lang rekkje soloplater, prosjekt, prisar og kappleikssigrar i bagasjen. Dei er begge durkdrevne trallarar. Øyonn er nok mest kjend for samarbeidet med Odd Nordstoga om tingingsverket “Nivelkinn”, og Marit kjenner mange som eine halvparten av duoen Sudan Dudan.

Konsertar:

2. mai kl 19:30 – Juret bar, Oslo 
3. mai 19:00 – Tou loftet, Stavanger
31. mai 19:30 – Sundrehall, Folkemusikkveka på Ål, Hallingdal
6. juli 15:30 – Bygdin Høifjeldshotel, Jørn Hilme-stemnet, Valdres 
6. juli 19:00 – Olestølen, Øystre Slidre
8. november – Rollag Folk & Jazzklubb, Numedal
22. november – Riksscenen, Oslo