Natursats: 70 millionar til lokale tiltak for naturen

Sjå fullstendig oversikt over tildelingane i vedlagd Excel-oversikt. 

–  Godt naturarbeid lokalt er viktig for å ta vare på naturen for framtidige generasjonar. Det store talet søknader om tilskot frå Natursats viser kor stort engasjement det er for natur rundt omkring i landet. Eg er glad for at vi no legg til rette for at kommunar og fylkeskommunar kan gjennomføre tiltak for å ta betre vare på naturen, seier klima- og miljøminister Andreas Bjelland Eriksen.

Natursats er ei tilskotsordning som mellom anna bidreg til at kommunar og fylkeskommunar kan gjennomføre tiltak og innhente kunnskap som grunnlag for å ta vare på naturmangfaldet.

No blir første runde med tilskot delt ut til over 170 lokale tiltak over heile landet, mellom anna naturrestaurering, skjøtsel av viktige naturtypar, arbeid med arealnøytralitet og informasjonstiltak.

Stor interesse for å ta vare på naturen

Miljødirektoratet fekk totalt 326 søknader om tilskot frå tilskotsordninga Natursats. 233 av søknadene handla om støtte til ulike lokale tiltak for naturmangfaldet, og det er desse tilskota som no blir delte ut. 127 av søknadene ønskte støtte til naturkartlegging, og til saman blir 43 millionar gitt til ulike kartleggingstiltak.

– Det er veldig gledeleg å kunne gi støtte til kommunar som ønskjer å kartleggje naturen i kommunen sin. Dette vil gi kommunane eit betre kunnskapsgrunnlag for å ta gode avgjerder knytte til natur i arealforvaltninga si, seier Hilde Singsaas, direktør i Miljødirektoratet.

Størstedelen av kartleggingane gjaldt ulike naturtypar på land, blant dei natur i pressområde for bustader, hytter og villrein.

Dette blir dessutan første gong Miljødirektoratet gir tilskot til kommunar for kartlegging av marint naturmangfald. Tolv kommunar får no støtte til å kartleggje naturen langs kysten, både i sør, vest og nord. Naturområda langs kysten er ofte under sterkt press, og det er stort behov for meir naturkartlegging.

Fram mot sommaren vil det også bli delt ut oppimot 40 millionar i tilskot til kommunar som har søkt om å gjennomføre såkalla planvask for å ta vare på naturmangfaldet, til kommunar som ønskjer å lage ein kommunedelplan for naturmangfald og dessutan til revidering av eksisterande naturmangfaldsplanar.

Kommunar i alle fylke får tilskot

På lista over kven som får tilskot til lokale tiltak for å bevare naturmangfaldet, finn vi tiltak i alle fylka i landet og i Longyearbyen. I år er det Akershus som får mest, med 9,1 millionar kroner. Rogaland følgjer som nummer to, med 7,8 millionar kroner.

Fylker	Tildeling
Akershus	9 075 000
Rogaland	7 836 100
Telemark	6 215 150
Vestfold	4 855 500
Innlandet	4 847 000
Vestland	4 775 000
Trøndelag	4 446 400
Møre og Romsdal	3 888 449
Buskerud	3 717 927
Agder	3 245 000
Troms	3 214 000
Østfold	2 220 130
Oslo	1 746 240
Nordland	1 500 000
Vestfold	1 360 000
Finnmark	900 000
Longyearbyen lokalstyre	600 000
Totalsummer	64 441 896

I tillegg står det att fire søknader der tildelinga kan bli oppimot 3,5 millionar kroner. 

Fakta: Natursats

• Natursats er ei tilskotsordning som mellom anna gir støtte til tiltak for å bevare naturmangfaldet.
• Kommunar, fylkeskommunar og Longyearbyen lokalstyre kan søkje om ulike tiltak.
• I 2025 var potten på 118 millionar kroner.
• Nesten 70 millionar er tildelte lokale tiltak for å vareta naturmangfald.
• Dei resterande midlane skal gå til tilskot til planvask, utarbeiding av kommunedelplan naturmangfald og revisjon av naturmangfaldsplanar. Desse midlane vil bli tildelte i juni 2025.