Forlengjer nattestenging E16 Åsbrekkegjelet-Skromle bru til påske

– Dårlig vér i det siste har stengt Hardangervidda, noko som har gjeve auka trafikk på E16. Det har gjort at vi ikkje har kunne stengja som planlagt, og framdrifta har difor ikkje vore slik vi hadde lagt opp til. Difor må vi no forlengja nattestenginga fram til påske, altså ut veke 15, seier byggjeleiar Vegard Klette i Statens vegvesen.

Opphavleg skulle nattestenginga vore avslutta torsdag denne veka.

Slik blir trafikkreguleringa

Vinteren er ikkje over enno, så Statens vegvesen tek høgde for fleire stengingar på Hardangervidda. Trafikkreguleringa ved Kvarmakløvet blir som før:

¤ Stengd klokka 00.00-03.00 

¤ Sleppa gjennom trafikk 03.00-03.15

¤ Stengd klokka 03.15-06.00

Stenginga finn stad natt til måndag, tysdag og onsdag og torsdag i fire veker til.

Det er ingen lokale omkjøringsalternativ medan vegen er stengd.

– For å minimera ulempene for trafikantane, har Statens vegvesen difor lagt arbeidet til tida på døgnet då det er minst trafikk. Og me har avgrensa jobben til fire netter i veka, understrekar byggjeleiaren.

Prosjektet har også arbeid på dagtid, med stenging i 15 minutt om gongen når det er naudsynt. Dette gjev redusert fartsgrense til 50 km/t der det føregår arbeid, og 70 km/t der det ikkje vert jobba.

– Ta omsyn til dei nedsette fartsgrensene. Dei er sette slik for å vareta tryggleiken også for dei som gjer vegarbeid. Overalt kor det er vegarbeid, må farten setjast ned i tråd med regelverket, avsluttar Klette.

Gjer meir på E16

Prosjektet som gjev breiare og meir oversiktleg veg, med gul midtstripe og kvit kantstripe, er ikkje det  einaste Statens vegvesen gjer for å ta vare det me har, i dette tilfellet E16 nord i Voss herad.

– Vi legg no sprutbetong i samband med brannsikring i Stalheimstunnelen. Jobben tek maksimalt 14 dagar. Arbeidstidene er klokka 20.00-06.00, med opning for trafikk annankvar time. I tillegg blir det opning for å koordinera med opninga gjennom Kvarmakløvet, seier teknisk byggeleiar tunnel Ivar Bergstrøm Lutro i Statens vegvesen.