Forsvarsbygg ođasmahttá rádárrusttega Máhkarávjjus Nordkáhppa gielddas

Stuorradiggi lea mearridan ahte dálá rádárrusttega sadjái galgá boahtit ođđa teknologiija, dusten dihtii boahttevaš operatiiva hástalusaid. Vihtta rádárrusttega ásahuvvojit ođđa báikkiide, ja dálá rádárbáikkiin leat fas guhtta mat joatkašuvvet.

—Nordkáhppa (Davvinjárga) joatkašuvvá ain guovddáš báikin Norgga áibmorádárráiddus. Ođđa rádárrusttegat veahkehit nannet Norgga suodjalusnávccaid ja leat NATO čalmmit davvin, lohká Forsvarsbygga prošeaktajođiheaddji Ylva Sneve.

Forsvarsbygg bargun lea plánet ja ásahit opmodagaid, visttiid ja rusttegiid mat devdet Suodjalusa dárbbuid. Forsvarsmateriell:s lea ollislaš prošeaktaovddasvástádus ja das lea ovddasvástádus teknologiija háhkamis Áibmosuodjalus) lea rádárvuogádagaid geavaheaddji.

Rusttet ii heađuš Nordkáhppa-šleađu gallededdjiid

Dálá rádárrusttega sadjái boahtá ođđa visti mas lea kuhppel, mii suodjala rádára dálkkiid vuostá. Ođđa rusttet galgá leat juste dan dálá rusttega bálddas, muhto veaháš davvioarjeleappos. Dálá geaidnu ođasmahttojuvvo ja bumma Eurohpágeainnu guvlui bisuhuvvo. 

—Dán geasi mii áigut ođasmahttit osiid sisabeassanluottas rusttegii, roggat vistesaji ja ásahit gaskaboddosaš rusttetsaji. Rusttetsadji máhcahuvvo meahccin go rusttet lea gárvvis. Ođđa rusttet ii heađuš Nordkáhppa-šleađu gallededdjiid, lohká Sneve.

Mearriduvvon huksenáigodat lea 2025-2028

Nordkáhpa rádárrusttega mearriduvvon huksenáigodat lea 2025-2028.

Huksenáigodagas šaddá veahá huksenjohtolat. Forsvarsbygg máhccá eanet dieđuiguin ovdal go huksemat álget.

Manne Norga dárbbaša ođđa rádáriid?

Otná rádáriin leat stuorra oassi main lea bistináigi nohkame ja daid ferte ođasmahttit vai sáhttet dustet boahtteáiggi hástalusaid. Ođđa rádárat dahket Norgga dorvvolaččabun daningo mii sáhttit buorebut fuobmát ja eastadit lobihis sisabahkkemiid min nationála áibmorádjái. Go geavahit soahtegirdiid ja eatnama alde girdisuodjalusa lotnolasat, de dat sihkkarastá min girdiavádaga ja nanne min militearaveaga doaibmafriddjavuođa. Rádárat addet dieđuid NATO:i ja dahket Norgga buoret lihtolažžan.