Samferdselsministeren opna vegprosjekt og utløyste skred

Tysdag 25. februar sette samferdselsminister Jon-Ivar Nygård spaden i jorda for byggestart på Nye Veier-prosjektet Rv. 13 Djupvik-Kviturtunnelen. Prosjektet er etterlengta i regionen, og vil gi færre stengingar av vegen. Det vil også vesentleg redusera risiko for ras. Samferdselsministeren kunne samstundes komme med gode nyheiter for innbyggjarane i Ullensvang.

- Det er gledeleg for meg å høyre at Nye Veier har bestemt at dei skal jobbe vidare med Rv. 13 her vi står i dag. Det skal byggjast 260 meter ekstra veg inn mot Odda. Nye Veier har òg sagt at dei no jobbar med konkrete planar for å redusere risikoen for ras og skred langs riksveg 13. Det første som blir aktuelt er å sikre ras sør for Odda, sa Nygård i sin tale under markeringa.

Lita bru skal bere store lass

Etter spadestikket var det duka for ei litt utradisjonell snorklipping – ei mikromarkering. I Seljestad har Statens vegvesen oppført ei 16 meter lang bru som del av førebuande prosjekter på E134 Røldal-Seljestad.

- E134 Røldal-Seljestad har forventa anleggsstart mot sommaren og er ein del av den viktige aust/vest-forbindinga i Noreg. I dag opna vi ei lita bru som skal bere store lass gjennom bygginga av prosjektet, seier Nygård.

Kontrollert skredutløysing

Regjeringa vil at folk skal kome seg trygt fram på norske vegar, og arbeider derfor kontinuerleg med utbetring og sikring av dei mest utsette strekningane. I ny Nasjonal transportplan viser regjeringa ein ansvarleg transportpolitikk, der vedlikehald og utbetringar er prioritert. Planen held fast på at transportsystemet i heile landet skal verte sikrare og meir motstandsdyktig mot til dømes ekstremvær, ras, skred og flaum.

Derfor runda Nygård av reisa med å teste kontrollert snøskredutløysing langs E134 Haukelifjell. Med bruk av skredtårn nyttast enten gass og trykk eller sprengstoff for å løyse ut eit kontrollert snøskred i fjellsida. På denne måten kan Statens vegvesen hjelpe naturen i gong med å utløyse skred i kontrollerte former, utan fare for reisande på vegen.

– E134 er ein av livsnervane mellom aust og vest i landet. Det arbeidet Statens vegvesen no gjer for aktiv skredkontroll spelar godt saman med dei infrastrukturtiltaka vi gjer for å kunne halde fjellovergangane våre opne gjennom vintersesongen. Vinteropne vegar er viktig for lokalbefolkninga, viktig for aust/vest-forbindinga, og viktig for næringslivet, seier samferdselsminister Jon-Ivar Nygård.