Foreslår det mest avgrensa laksefisket i historia

– Fordi det dei siste åra har komme historisk få laksar inn til norskekysten ser vi oss nøydde til å foreslå store avgrensingar i laksefisket i år, seier direktør for Miljødirektoratet, Ellen Hambro.

Miljødirektoratet har sendt ut forslag til endringar i laksefisket i sjø og elv (sjå tre vedlegg til pressemeldinga). Forslaget omfattar innstrammingar for totalt ni sjøområde og 42 elvar. Seks av dei ni sjøområda ligg i Finnmark. Fristen for å gi innspel til forslaget er 14. mars 2025, og endringane skal tre i kraft frå fiskesesongen i år.

Viktige lakseelvar påverka

Mange viktige lakseelvar får innført strenge restriksjonar på laksefisket, dersom Miljødirektoratets nye forslag til fiskereglar blir vedteke. Blant desse er Numedalslågen, Mandalselva og Suldalslågen i sør, dei store lakseelvane i Trøndelag og nokre elvar i Finnmark. Det er også fleire elvar i Vestland og Møre og Romsdal som får strengare avgrensingar enn i dag.

– Laksebestandane i mange av elvane der vi foreslår strengare avgrensingar i fisket, er avhengige av at mykje stor holaks ikkje blir fiska opp og får delteke i gytinga. Stor holaks legg grunnlaget for mange lakseungar, seier miljødirektør Ellen Hambro.

Kritisk for laksen i Tana

Miljødirektoratet foreslår også at det ikkje lenger blir noko laksefiske i sjø i Finnmark, der den kritiske situasjonen for laksen i den store Tanaelva er årsaka.

– Tanaelva er ei av dei viktigaste lakseelvane i verda. Fordi laks frå Tanavassdraget blir fiska i sjølaksefisket i heile Finnmark, er tilstanden til laksebestandane i Tanavassdraget i stor grad styrande for kva laksefiske som kan tillatast i sjøen i heile Finnmark, seier Ellen Hambro.

Tre rekorddårlege år sidan 2021

Det mest omfattande sjølaksefisket vi har i Noreg er i Namsfjorden i Trøndelag. Her foreslår Miljødirektoratet å utsetje fiskestarten med fem dagar, til 15. juni. Den vekefaste fisketida foreslår direktoratet å redusere med ein firedel samanlikna med i dag, i perioden frå 15. juni til 1. juli. I tillegg er det foreslått nokre mindre innstrammingar i sjølaksefisket i Nordfjord i Vestland og i Kvænangen i Troms.

– Den gongen dei gjeldande føresegnene for laksefisket vart innførte var det langt meir laks som kom tilbake til kysten frå havet enn det er no. Det er derfor behov for å redusere fisket. Dei tre dårlegaste lakseårene historisk sett har vore i perioden etter 2021, seier Hambro.

Har tidlegare varsla føre var-strategi

Miljødirektoratet har tidlegare varsla at det er behov for strengare reguleringar, og ein føre-var-strategi for laksefisket. Dette inneber eit meir avgrensa fiske i starten av sesongen, med moglegheit for å opne for meir fiske seinare dersom innsiget av laks viser seg å vere godt nok.

– Gjennom å foreslå ein meir forsiktig start på laksefisket, ønskjer vi mellom anna å redusere risikoen for at vi akutt må stengje fisket i mange elvar tidleg i sesongen, slik vi såg oss nøydd til i fjor. Vi håpar at dette kan betre føreseielegheita både for dei som leiger ut fiskerettar og for dei som kjøper rettane til å fiske, seier Hambro.

Her er dei 42 elvane der Miljødirektoratet foreslår innstrammingar i laksefisket:

• Agder: I Tovdalselva, Otra, Mandalselva og Lygna blir det foreslått justerte fisketider og/eller kvotar.
• Akershus: I Åroselva blir det foreslått døgnkvote, og forbod mot å avlive laks større enn 80 cm.
• Finnmark: Forslag om redusert fisketid i Børselv, Bergebyelva, Vestre Jakobselv og Komagelva.
• Møre og Romsdal: Korsbrekkelva, Eira, Osenvassdraget, Surna og Raumavassdraget: Forslag om justerte fisketider og/eller kvotar. Forslag om berre sjøaurefiske i Rauma. Tafjordelva foreslåast ikkje opna for fiske.
• Rogaland: Suldalslågen, Vikedalselva: Forslag om utsett fiskestart og justerte kvotar. Storelva i Sauda blir ikkje foreslått opna for fiske.
• Trøndelag: Orkla, Gaula, Nidelva, Stjørdalselva, Verdalselva, Steinkjervassdraget og Namsenvassdraget: Forslag om justerte fisketider og/eller kvotar.
• Vestfold: Numedalslågen: Forslag om justerte fisketider og/eller kvotar.
• Vestland: Oselva, Modalselva, Haugsdalselva, Vikja, Nærøydalselvi, Songdalselva, Daleelva (Høyanger), Gaula (Sunnfjord), Nausta, Åelva/Ommedalselva, Hopselva, Gloppen, Strynelva, Eidselva og Hjalma: Forslag om justerte fisketider og/eller kvotar.
• Østfold: Glomma: Forslag om justerte kvotar