Styrkar det regionale NATO-samarbeidet

Eigedom, bygg og anlegg er ein viktig innsatsfaktor for å bygge forsvarsevne. Det gjeld utviklinga av eit sterkt nasjonalt forsvar, og det gjeld evne til å vere eit godt mottaksland i NATO-samanheng. Noreg, Sverige og Finland er alle ein del av den same regionale kommandoen i NATO. Trening og allierte øvingar kryssar landegrensene, og planlegging av alliert mottak sest i ein større samanheng. 

For å ytterlegare styrke samarbeidet i regionen har dei tre etatane som har ansvar for infrastruktur, eigedom, bygg og anlegg i Noreg, Sverige og Finland signert ein intensjonsavtale om enda tettare samarbeid. Dei tre etatane skal dele ekspertise og arbeide saman i planprosessar for å legge til rette for betre vertslandstøtte i NATO. Avtalen inkluderer også mellom anna eit tettare samarbeid om utvikling av moderne infrastruktur for forsvarssektoren, samarbeid om miljø, energi og berekraft og om anskaffingsprosessar. 

Avtalen blei signert av dei tre direktørane Matias Warsta, Maria Bredberg-Petterson og Thorbjørn Thoresen, på eit felles møte på Svalbard tidlegare i januar. På dette møtet var dei tre direktørane også i møte med Statsbygg på Svalbard, for å sjå nærmare på utvikling av infrastruktur og klimapåverknad i arktiske strøk.  

Avtalen blir omgåande sett i verk. 

Infrastruktur tar ikkje omsyn til landegrenser. Noreg, Sverige og Finland har mykje å hente på å arbeide som ein felles region. Det gjeld både i dei tre landa og i NATO–samanheng. Vi i Forsvarsbygg ser fram til å samarbeide enda tettare med våre svenske og finske kollegaer. Dette vil bidra til å bygge meir forsvarsevne både i Noreg og i regionen, seier Thorbjørn Thoresen, direktør Forsvarsbygg om avtalen. 

Bakgrunn
Organiseringa av infrastruktur, eigedom, bygg og anlegg er forholdsvis lik i dei tre landa. Alle landa har eigne etatar som har fagansvar for både forvaltning av infrastruktur og investeringsprosessar for å skaffe ny infrastruktur. Finske Puolustuskiinteistöt (Defence Properties Finland), svenske Fortifiationsverket (Swedish Fortifications Agency) og norske Forsvarsbygg (Norwegian Defence Estate Agency) er allereie samarbeidspartnarar i eit meir omfattande nordisk/baltisk samarbeid der alle land i Norden og Baltikum inngår. Den nye trilaterale samarbeidsavtalen kjem i tillegg til dette, og utdjupar samarbeidet mellom desse tre landa.