Opnar for eksterne testbrukarar av fototenesta i Digitalarkivet – Bergen byarkiv er først ute

Byarkivar i Bergen Jan Tore Helle er glad for å kunne dele byens fotoarv med eit breiare publikum: 

 – Dette er ein viktig del av satsinga vår på betre digitale brukartenester for arkiv. Målet er at kjeldene, i dette tilfellet foto, skal nå ut til fleire brukarar og skape større engasjement for byens historiske fotoarv. 

Dei historiske bileta omfattar alt frå bybilete og natur til portrett og daglegliv i Bergen. Samlinga gir eit unikt innblikk i byens utvikling gjennom tidene. 

Samla og tilgjengeleg på éin stad 

At eksterne no kan teste å publisere dei historiske fotoa sine på Digitalarkivet, er eit viktig og etterlengta steg på vegen til å bli ei nasjonal fellesløysing for historiske data. Målet er at brukarane skal finne informasjon frå stat, kommune og privat sektor samla på éin stad, uavhengig av format. 

Riksarkivar Inga Bolstad framhevar kor viktig det er å samle ulike arkivressursar i ei fellesløysing som Digitalarkivet: 

– Foto er ein viktig del av den nasjonale kulturarven vår. Offentleg sektor var tidleg ute med å bruke den nye teknologien som fotografi var. Mykje fotohistorie er derfor bevart i offentlege arkiv. I dag er foto ein naturlig del av den dokumentasjonen offentlege verksemder skaper. Foto er dokument som inngår sakshandsaminga og dokumentasjonen i offentleg sektor. I tillegg er fotografi ein viktig del i mange privatarkiv som kan vere med å sikre ei meir heilskapleg samfunnsdokumentasjon. Arkivverket er opptekne av at Digitalarkivet skal sikre arkiv og gjere det tilgjengeleg, uavhengig av format. Dette er eit viktig skritt på vegen dit.

Pilot med gode resultat 

Bergen byarkiv har samarbeidd tett med Arkivverket gjennom ein pilotperiode for å teste den nye fototenesta. Rådgivar Ståle Krantz Bruland er svært nøgd med prosessen: 

 – Arkivverket har følgt oss opp tett for å sikre ei god overføring av bilete og metadata. Vi fekk tilgang til ein eigen Teams-kanal for rask kommunikasjon og løysing av problem undervegs. Dette bidrog til ei effektiv overføring på kort tid. Vidare har opplæringa i det nye produksjonsmiljøet vore strålande, og vi kunne starte opplasting av nye bilete allereie før pilotperioden var over. 

Bruland understrekar at Arkivverket har vore lydhøyre for tilbakemeldingar og brukarerfaringar, noko som legg grunnlag for vidare forbetringar. – Forbetringa vi ser mest fram til, er å kunne vite kor mykje bileta blir brukt, seier Bruland. 

Du kan sjå alle bileta frå Bergen byarkiv her. 

Du kan også lese om korleis du søkjer i fotosøket i Digitalarkivet her.