Rekordmange jerv felt i år

– Jervebestanden har dei siste åra vore høgare enn bestandsmålet Stortinget har sett, og den ordinære lisensjakta er viktig for å regulere bestanden, seier direktør for Miljødirektoratet, Ellen Hambro.

Stortinget har vedteke at bestandsmålet for jerv er 39 kvalpekull per år. Det vart i 2024 registrert 61 kull, og ni har vorte avliva. Direktoratet vedtek kvart år ekstraordinære uttak av jerv for å regulere bestanden mot måltala. I 2024 er det primært i Trøndelag og Innlandet bestandane har lege over bestandsmålet.

Meir effektive hundar

Blant dei store rovdyra er jerv den største skadegjøreren på både sau og tamrein. 60 jerv har vorte felt på ordinær lisensfelling til no i lisensjakta, som starta i haust og blir avslutta i februar. Aldri før har det vorte skote fleire jerv av lisensjegerar enn i haust. Særleg effektiv har jakta vore i Innlandet, der det er felt meir enn 30 dyr av lisensjegerar i prioriterte område der sau og rein beitar.

– Dei fellingane som er gjorde i løpet av hausten bidreg til å redusere tap av sau og tamrein i område med jerv, og behovet for ekstraordinære uttak som blir vedtekne av Miljødirektoratet blir mindre i område der jegerane lykkast, seier miljødirektør Ellen Hambro. 

Betre hundar er ein av grunnane til at lisensjegerane har vorte meir effektive.

– Vi ser at ein del jegerar har fått fram hundar som fungerer godt på jerv, og dette har bidrege til auka fellingstal særleg i Innlandet og Trøndelag, seier Ellen Hambro.

Ekstraordinære uttak i tre område blir vidareførte

Sjølv om lisensjegerar har felt mykje jerv gjennom den ordinære lisensjakta, vedtok Miljødirektoratet i haust at Statens naturoppsyn (SNO) skulle setje i gang ekstraordinært uttak av jerv i visse område innanfor gamle Oppland fylke, Møre og Romsdal og Trøndelag. Dette fordi desse områda har opplevd at mykje sauer har gått tapt til jerv i år. Miljødirektoratet fører vidare desse avgjerdene om ekstraordinære uttak på nyåret.

Miljødirektoratet skal utover vinteren og våren vurdere om det er behov for ekstraordinære uttak av jerv fleire stader. Dette er særleg aktuelt der lisensjegeren ikkje har lykkast med å felle jerv. Direktoratet baserer vurderingane på SNOs overvaking av bestandssituasjon og skadedokumentasjon. Resultata frå den pågåande lisensfellinga, skadepotensialet som jerven utgjer for beitedyr, og tilrådingar frå rovviltnemndene, er også med i vurderinga.

Miljødirektoratets avgjerder om ekstraordinær felling av jerv, og resultat av oppdraga, vil løpande bli lagt på nettsidene til direktoratet under fanen Ekstraordinære uttak.