Kristin Armstrong-Oma er ny direktør ved Arkeologisk museum

– Eg gler meg stort til å ta fatt på oppgåva. Særleg fordi eg får med meg eit lag av eksepsjonelt flinke folk, mellom anna forskarar i verdsklassen, seier Armstrong-Oma.  

Arkeologisk museum ved Universitetet i Stavanger er eit tverrfaglig museum med oppgåver innafor forsking, formidling, kulturminnevern, konservering samt dokumentasjon og samling. 

Armstrong-Oma blir den første kvinnelege direktøren sidan museet opna i 1975.   

– Det er kjempekult, og absolutt på tide! Eit av dei siste flaka av glastaket har losna, og det kjennes bra, seier ho.

– Vi skal vera relevante

Armstrong-Oma seier at hennar ambisjon er at museet skal levera høg kvalitet i alle ledd, og vera relevante for samfunnet rundt oss.

– Kulturarven som museet forvaltar er vår felles arv, og det er eit høgtidsamt ansvar å sørga for at den har best mogleg vilkår. Samstundes er kulturarven stadig relevant, seinast gjennom UNESCO-tildelingane til seterkultur og bunaden sist veka, og museet skal vera framoverlent i møte med samfunnet. Det gjer me ved å vera ein arena for den store samtalen om kven me er, gjennom våre forskingsprosjekt, forvaltningsprosjekt, utstillingar og aktivitetar, seier Armstrong-Oma.  

Eit universitetsmuseum

Arkeologisk museum har vore ein del av Universitetet i Stavanger sidan 2009.

–Som universitetsmuseum skal me fortsetja å vera UiS i sentrum, og eg ynskjer å legga til rette for auka samarbeid mellom museet og dei andre fakulteta, seier Armstrong-Oma.

Rektor Klaus Mohn ved Universitetet i Stavanger gratulerer Armstrong-Oma som museumsdirektør, og ser fram mot vidare samarbeid.  

– Me gler oss til å få Kristin Armstrong-Oma med på laget. Arkeologisk museum skal være en samfunnsaktuell arena, og eg er sikker på at Armstrong-Oma kjem til å ivareta dette på best mogleg måte, seier Mohn.

Starta som feltarkeolog

Armstrong-Oma starta sin karriere ved museet som feltarkeolog i 1998. Sidan 2013 har ho jobba fast ved museet, og har mellom anna vore leiar for avdeling formidling og forskingleder. Armstrong-Oma tok doktorgraden i arkeologi ved University of Southampton i England, og har også jobba i fleire år som universitetslektor og postdoktor ved Universitetet i Oslo. Ho er spesialist på relasjonar mellom menneske og dyr i bronsealder- og jernaldersamfunnet. Ho tiltrer som museumsdirektør 17. mars neste år.