Auka etterleving i innrapporteringa av kryptoeigedelar

Norske skattepliktige sat i 2023 på kryptoeigedelar for vel 17,3 milliardar kroner, ifølgje tal frå skatteoppgjeret som vart gjort kjent denne månaden. Det er meir enn ei dobling frå 8,2 milliardar kroner i kryptoformue året før.

54 000 rapporterte i fjor at dei eigde kryptoeigedelar i skattemeldinga. Dei siste åra er det gjennomført fleire tiltak som rettleiing og kontrollar, for å få eigarar til å føra desse eigedelane opp i skattemeldinga. Etterlevinga på innrapporteringa har auka frå vel 15 000 i 2020 til meir enn det tredobbelte i fjor.

– Etterlevinga har betra seg over tid, men det er framleis for mange som ikkje rapporterer inn kryptoeigedelar, slik dei skal. Hugs at du kan endra opplysningane og levera skattemeldinga på nytt i tre år etter innleveringsfristen dersom du har noko å retta opp, seier skattedirektør Nina Schanke Funnemark.

Rapporterer du ikkje inn kryptoeigedelane dine, risikerer du tilleggsskatt. I dei mest alvorlege tilfella kan du bli meld til politiet.

Vil motta fleire opplysningar

Frå 2026 kan dei som driv vekslings- og oppbevaringstenester med kryptoeigedelar få rapporteringsplikt til Skatteetaten, såkalla tredjepartsrapportering.

Finansdepartementet sende tidlegare denne månaden eit forslag ut på høyring om at norske tenestetilbydarar i framtida må senda inn opplysningar om kryptoeigedelar som utanlandske og norske skattepliktige eig til Skatteetaten.

Noreg vil utveksla opplysningar med utanlandske skattestyresmakter og vil få opplysningar om norske skattepliktige som bruker vekslings- og oppbevaringstenester i andre land.

– Skatteetaten er veldig nøgde med at me snart kan få på plass ei automatisk informasjonsutveksling om kryptoeigedelar mellom ei rekkje land. Me får allereie finansopplysningar frå andre land om personar som er skattepliktige til Noreg, og med dette arbeidet vil me ta eit nytt stort steg mot rett skattlegging av utanlandske verdiar, seier skattedirektøren. 

Kan utføra målretta kontrollar mot dei som unndreg skatt

Automatisk informasjonsutveksling om kryptoeigedelar mellom landa krev regelverksutvikling i kvart enkelt land, og høyringa er eit viktig steg vidare. I høyringa vert det føreslått at lovendringane trer i kraft 1. januar 2026, med første rapporteringa til skattestyresmaktene i 2027. På sikt håpar Skatteetaten å få på plass ei delvis førehandsutfylling av kryptoeigedelar i skattemeldinga, og Skatteetaten har etablert ei eiga gruppe på tvers av heile etaten som jobbar med krypto.

– Informasjonsutveksling om kryptoeigedelar kan bidra til at endå fleire nordmenn får betre hjelp til å melda frå om verdiane sine, og det gjer oss betre rusta til å utføra målretta kontrollar mot dei som ønskjer å unndra skatt, seier skattedirektør Nina Schanke Funnemark.

Dette viser tala frå skattemeldinga 2023

• Vel 54 000 personar rapporterte inn at dei eigde kryptoeigedelar i 2023. 48 150 personar rapporterte at dei eigde kryptoeigedelar i 2022.
• Den rapporterte inntekta var på 2,5 milliardar kroner i 2023 mot 3,3 milliardar kroner året før.
• Den rapporterte formuen var på 17,3 milliardar kroner i 2023 mot 8,2 milliardar kroner året før.
• Det rapporterte frådraget var på 2,1 milliardar kroner mot 3,6 milliardar kroner året før.

 

Slik rapporterer du inn kryptoeigedelar

Har du gevinst, inntekt, formue eller tap i kryptoeigedelar som til dømes kryptovaluta eller NFT, må du sjølv oppgi det i skattemeldinga. Slik gjer du det: Virtuelle eigedelar (kryptovaluta med meir) Har du selt kryptoeigedelar med tap, kan du få frådrag for det, men du må kunna dokumentera både inngangsverdien og salsprisen så godt som mogleg med til dømes informasjon frå kryptobørsane. Her kan du lesa meir om både skattereglane og mellom anna tap ved svindel: Skattereglar - Virtuelle eigedelar - Skatteetaten

Det er viktig å passa på at det samla resultatet for alle transaksjonane er meldt inn (gevinst/tap) – ikkje berre totalt kor mykje kryptoeigedelar du eig.

I tre år etter innleveringsfristen kan du endra opplysningane og levera skattemeldinga på nytt. Slik gjer du det: Endringsmelding for formues- og inntektsskatt for personlege skattepliktige - Skatteetaten