To nye songar frå Ingebjørg Bratland og Odd Nordstoga.

«OK, me sjåast i 2024 då» sa me til kvarandre. Noreg blei stengd ned enno ein gong. Me stod på bakscena i Drammen teater ein desemberkveld i 2021 og var nedslåtte. Det var meg og Det Norske Kammerorkester. Resten av årets turné hadde akkurat blitt avlyst. 

No skriv me endeleg 2024 og det er endeleg snart tid for ei ny reise med kammerorkesteret og med jul på reportuaret. Skulle me berre ta opp tråden der me slutta sist, eller skulle me finne på noko ekstra? Kva med å spørje Ingebjørg Bratland om å bli med? Ingebjørg sa ja – eller rettare, ho sa «JA!», og no er det berre ein dryg månad til det brakar laus. Det blir Ingebjørg Bratland, Odd Nordstoga, Det Norske Kammerorkester og jul! 

Innimellom heftig turnéring med «Langt heimafrå» prosjektet vårt har Ingebjørg og eg funne fram to julesongar som me har øvd litt på i ledige stunder. Den fyrste og opplagte er «Joleklokker over jorda». Det er ein julesong som kanskje ikkje er like kjend over heile landet, men mykje brukt i våre heimtrakter. Ingebjørg nynna litt på den på nokon lydprøver, og eg tenkte at der har me ein nydeleg låt som passar oss! Den andre er ein liten song om å gå rundt juletreet som eg laga før jula i fjor. Det var Ingebjørg som syns den var så fin at me også burde bruke denne. Dermed blei den også med. 

Me fann ein dag i mai, tok med gitarane våre og spelte dei inn med vår eminente produsent Kåre Vestrheim i Propeller studio i Oslo. Kåre blei også med på piano og trøorgel. Slik blei musikken til. Resultatet kan du høyre på vår splitter nye doble julesingle som me har kalla «Joleklokker». Den fyrste dagen i november er songane dykkar. - Odd Nordstoga