Høge karakterkrav på mange studium og få ledige plassar ved NTNU

NTNU har sendt ut i alt 17 149 tilbod om studieplass i år. 14 157 av desse gjeld studiar i Trondheim. Ålesund gir 1372 tilbod, medan Gjøvik gir 1887.

– Det er generelt svært attraktivt å studere ved NTNU. I all hovudsak fyller vi studieplassane våre med godt kvalifiserte studentar innanfor breidda av våre utdanningar. Mange studium har svært høge inntakskrav og lange ventelister, seier Marit Reitan, prorektor for utdanning ved NTNU.

Dette gjeld mellom anna medisin, psykologi, mange masterprogram i teknologi og økonomiutdanningar.

 Innan teknologistudia er det spesielt høge karakterkrav for førstegangssøkjarar for å kome inn på industriell økonomi og teknologileiing, nanoteknologi, kybernetikk og robotikk, samt flyingeniør.

– Vi bekreftar vår dominerande posisjon i Noreg innan teknologiutdanningar og økonomistudiar med teknologisk profil, seier Reitan.

Ledige studieplassar vert raskt fylt opp

Også NTNU er påverka av den nasjonale trenden der færre vil bli lærarar og lektorar. Det var 140 ledige studieplassar ved grunnskolelærarutdanningane ved årets opptak.

– Då var det svært positivt at dei ledige studieplassane som vart lagt ut i grunnskulelærarutdanningane, raskt vart fylt opp, seier Reitan.

Samstundes presiserer ho at NTNU enno ikkje veit om alle dei som har søkt desse plassane, er kvalifiserte. NTNU tok valet å oppretthalde karakterkrava både på sjukepleiar- og lærarutdanningane sjølv om Kunnskapsdepartementet har opna for å søkje om dispensasjon.

– Vi meiner at det bør vere høge krav for å ha dei naudsynte forkunnskapane til å gjennomføre slike krevjande studium, seier Reitan.

Lang venteliste for sjukepleiestudiet i Trondheim

Det er høge karakterkrav og lang venteliste for å studere sjukepleie i Trondheim. I Gjøvik og Ålesund vart det lagt ut ledige studieplassar innan sjukepleie. Desse plassene er no fylt opp, også her med atterhald om at søkjarane er kvalifiserte.

Elles er det venteliste på alle helse- og sosialfagutdanningane ved NTNU. Nytt av året er medisinutdanning med delt studiestad mellom Trondheim og Gjøvik.

– Det er svært mange kvalifiserte søkjarar til alle våre studiestadar innan medisin. Vi er særlig fornøgde med stor interesse for medisinstudiet med studiestad i Gjøvik, seier Reitan.

Stor interesse for nytt flyingeniørstudie

Det nyoppretta flyingeniørstudiet med 25 studieplassar er svært populært, og her står 603 på venteliste.

– Studiet vart oppretta på oppdrag frå Kunnskapsdepartementet for å fylle eit viktig samfunnsbehov, og vi er glade for å sjå stor interesse for dette programmet, seier Reitan.

Bekymra for bortfall av kjønnspoeng

Opptakstala viser eit kjønnsdelt utdanningsmønster. 35 prosent av dei som har fått tilbod om plass innafor teknologi er kvinner. For lærar- og helseutdanningar er det 66 og 82 prosent kvinner.

 Kunnskapsdepartementet har vedteke at NTNU ikkje får bruke kjønnspoeng på nokre av dei femårige teknologistudia. Det er også langt færre av dei treårige ingeniørstudia som har fått kjønnspoeng. Dette har gjennomgåande ført til lavare kvinneandel.

– NTNU er bekymra for dette. Vi ønskjer at det framleis skal være mogleg å bruke treffsikre verkemedel for å få økt kvinneandelen innanfor teknologiområdet. Vi ser fram til å diskutere dette med Kunnskapsdepartementet i prosessen med utforming av det nye opptakssystemet som kjem til hausten, seier Reitan.

Kontaktinformasjon: Marit Reitan, prorektor for utdanning. Mobil 918 97 881 https://www.ntnu.no/ansatte/marit.reitan

Kontaktinformasjon: Tor Grande, rektor ved NTNU. Mobil 976 16 918 https://www.ntnu.no/ansatte/tor.grande