25 kommunar får tilskot til bustadtiltak i distrikta

Husbanken har teke imot 57 søknader om tilskot til bustadtiltak i distrikta. Av desse har Husbanken og Distriktssenteret i fellesskap valt ut 25 prosjekt som får tilskot.

– Mange distriktskommunar har små bustadmarknader med låg omsetjing og lite nybygging. Tilskota vi gir, skal bidra til auka bustadbygging, eit meir variert butilbod og tilgang på fleire eigna bustader i distrikta, seier administrerande direktør i Husbanken, Jan Hjelle.  

Bustadutvikling og transformasjon

Her er nokre eksempel på prosjekt som får tilskot:

Ål kommune har fått 550 000 kroner til å kartlegge drifts- og finansieringsmodellar for eit regionalt bu-pilotkontor i Hallingdal. Dei skal samarbeide med fleire kommunar og andre aktørar, og målet er eit politisk vedtak om finansiering og etablering av bu-pilotkontoret.

Rauma kommune har fått 330 000 kroner for å greie ut korleis ein tidlegare prestegardsbustad kan bli tilpassa framtidige behov i kommunen.

Træna kommune har fått 800 000 kroner til å stimulere bustadutviklinga, gjennom samarbeid med private aktørar og næringslivet. Kommunen skal sette i gong eitt nytt bustadprosjekt som kan møte det akutte bustadbehovet i kommunen, og legge grunnlaget for fleire prosjekt framover.

Skjåk kommune har fått 1 000 000 kroner til å vidareføre prosjektet «Prøvebu i Skjåk». Kommunen skal vidareutvikle prøvebu-prosjektet og konkretisere ulike finansieringsmodellar for huskjøparar.

Kriterium for å få tilskot

Husbanken og Distriktssenteret har prioritert prosjekt som vil utvikle nye samarbeidsformer, forsøk med nye bustadkonsept og verkemiddel som bidreg til auka tilgang til eigna bustader i distriktskommunar. For eksempel:

• Modellar for eige/dele/leige og sikring mot tap ved sal av nye bustader
• Nye måtar å samarbeide med utbyggarar og andre aktørar på, for å styrke bustadmarknaden
• Samarbeid mellom kommunar om bustadutvikling
• Nye bustadkonsept og buformer som gir eit meir variert og framtidsretta bustadtilbod for ulike målgrupper, for eksempel unge vaksne og unge eldre
• Prosjekt som bidreg til auka tilgang til eigna bustader, for eksempel gjennom transformasjon og gjenbruk av eksisterande bustader og bygg

– Vi har òg lagt vekt på at kunnskapen som blir utvikla i prosjekta, skal dokumenterast, formidlast og blir delt på ein slik måte at andre kan ha nytte av erfaringane frå prosjektet, seier prosjektleiar Gry Kongsli i Husbanken.

Husbanken og Distriktssenteret vil følge opp kommunane som får tilskot og tilby kompetansestøtte og arenaer for erfaringsdeling.

Desse prosjekta får tilskot:

Namn på søker	Namn på prosjekt	Tilskotsbeløp
Andøy kommune	Andøy Boligbyggelag	650 000
Berlevåg kommune	Bygdevekstpilot Vestre Varanger – Utvikling av strategisk bustadplan for Berlevåg, Båtsfjord, Nesseby og Tana	700 000
Dovre kommune	Mikrobruk	750 000
Drangedal kommune	Aldersvennleg lokalsamfunn – Drangedal	1 200 000
Evenes kommune	Berekraftig bustadutvikling i Evenes kommune	1 330 000
Fjord kommune	Utviklingsprosjekt – Skape bulyst gjennom attraktive bustader	1 500 000
Folldal kommune	Forprosjekt/Fase 2 – gjenbruk av gamle institusjonsbygg – Verket skole, Folldal og Bergseth alders og sjukeheim, Rendalen	1 930 000
Fyresdal kommune	Århusjordet	950 000
Gjemnes kommune	Bustaddraumen Gjemnes	420 000
Hammerfest kommune	Felles saksbehandlingskontor for startlån for bygdevekstpilotane i Finnmark	600 000
Høylandet kommune	Lage rettleiar	750 000
Meråker kommune	Bustadutvikling i Meråker sentrum (Meråkertunet)	350 000
Overhalla kommune	Leigebustader ved Skage frivilligsentral	700 000
Rauma kommune	Moglegheitstudie – framtidig bruk av prestegardsbustaden på Åndalsnes	330 000
Rennebu kommune	Arena Rennebu	560 000
Røst kommune og Værøy kommune	Ein bustadmarknad i bevegelse?	1 900 000
Røyrvik kommune	Saman blir vi gode på bustad	700 000
Sjåk kommune	Bustad- og tilflyttarprosjektet "Sats på Skjåk" – FASE 2	1 000 000
Sør-Aurdal kommune	Fjellvik – forprosjekt	950 000
Tokke kommune	Frå prøvebu til integrert innbyggar	600 000
Træna kommune	Bo i Træna	800 000
Tydal kommune	Bustad for alle	1 200 000
Vågå kommune	Småhus i Kjøpangervegen 3	80 000
Øystre Slidre	Transformasjon og vidare bruk av institusjonslokala til Øystre Slidre sjukeheim – Ein moglegheitsstudie for å bidra til auka bustader i distriktskommunar	500 000
Ål kommune	Regionalt bu-pilotkontor i Hallingdal	550 000

Fakta om tilskotet:
Tilskot til bustadtiltak i distrikta er ein del av tilskotsordninga «Tilskot til bustadtiltak». I denne ordninga inngår òg tilskot til bustadsosiale tiltak og driftstilskot til leigertakarorganisasjonar. Den totale tilskotsramma for ordninga er 37,5 millionar kroner i 2024. Dette er ei auking på 15,3 millionar frå 2023. Husbanken har i 2024 teke imot 146 søknader om til saman 133 millionar kroner.

Desse fekk tilskot til bustadsosiale tiltak i 2024