Framleis auke i flytrafikken i mai og dronerekord

Talet på innanlandsreisande har auka med 2 prosent, frå 2,49 millionar i 2023 til 2,55 millionar i 2024. Talet på utanlandsreisande auka også, med 9 prosent. Talet for utanlandsreisande var 1,75 millionar i 2023 medan vi har 1,91 millionar i 2024. Det samla talet på passasjerar er høgre enn forventningane vi hadde ved inngangen til året. Det er utanlandstrafikken som presterer over forventning.  

– Utviklinga i marknaden er positiv, og vi ser at flya fyllast betre enn i same periode i fjor. Vi ser i inngangen til juni at sommartrafikken er komen godt i gang med mange reiseglade nordmenn på veg til utlandet, men også turistar inn til Noreg. Delen turistar inn er framleis på veg oppover etter pandemien og komande sommar er venta å ligge godt over fjoråret for denne kategorien reisande, fortel Gaute Skallerud Riise, direktør for trafikkutvikling i Avinor.  

– Sjølv om den norske marknaden utviklar seg positivt år for år, ser vi likevel ei svakare utvikling i Noreg til skilnad frå fleire av dei europeiske marknadene. Dette uroar oss, sidan det fører til svekka konkurransekraft for norsk næringsliv, fortel Riise. 

Riise legg vidare til at utviklinga i den internasjonale fraktmarknaden held fram med styrke, og den positive trenden for Oslo lufthamn held fram med ein vekst i tonn for mai månad på heile 17 prosent.

– Det er i hovudsak snakk om sjømat, men vi ser at meir og meir netthandel finn vegen via Oslo lufthamn i staden for å bli frakta inn med lastebil frå andre knutepunkt i Europa, avsluttar Riise. 

Passasjertal og flyrørsler i mai
Det var 64 419 flyrørsler i mai. Dette utgjer ei marginal endring samanlikna med mai i fjor, da talet var 64 480.   

Flest reisande hadde Oslo lufthamn med 2 347 000 passasjerar, ei auke på 7 prosent frå i fjor. Nest flest hadde Bergen lufthamn, med 583 000 reisande, 1 prosent auke frå i fjor. Tredje flest hadde Trondheim lufthamn, med 360 000 reisande, 1 prosent auke frå i fjor.  

Sjå fleire trafikktal i vedlegga.  

Ny rekord i droneflyging – nesten 3000 flygingar i mai 
I mai vart det meldt inn 2996 flygingar med drone i Ninox Drone, Avinor sitt system for handtering av dronar.    

– Sol og sommar aukar bruken av dronar kraftig. Me ser meir enn ei dobling frå mai 2023, seier Mats Gjertsen som leiar Avinor sitt droneprogram.   

– I tillegg har vi nå passert 10.000 registrerte brukarar i Ninox Drone, og vi oppmodar alle som skal ut å fly drone til å laste ned appen, seier Gjertsen.  

Se alt av Avinors trafikkstatistikk her: Trafikkstatistikk - Avinor