Passasjertrafikken over lufthamnene auka med 10 prosent i april

Det er særleg talet på innanlandsreisande som aukar, med 14 prosent. Talet på utanlandsreisande auka også, med 5 prosent. Samla er totaltrafikken i tråd med prognosane for året.

-Bakgrunnen for den kraftige veksten på innland i april og den noko lågare veksten på utland, er knytt til at påska i fjor fall i april. Påska er ein periode med få reiser innanlands og auke blant utanlandsreisande, fortel Gate Skallerud Riise, direktør for trafikkutvikling i Avinor. 

Riise legg vidare til at utviklinga i fraktmarknaden held fram med styrke, og det blir transportert betydeleg meir gods over Oslo lufthamn enn vi såg i same periode i fjor: -For april er voluma opp med 22 prosent, eller heile 15 143 tonn, medan det så langt i år er ein oppgang på 15 prosent og 59 755 tonn. Dette er i tråd med vår strategi om å trekke meir fraktvolum over våre lufthamner for å styrke tilgjengelegheita til den norske marknaden for gods og passasjerar, framfor at gods blir floge inn og ut frå andre stader i Europa for så å sendast på lastebil til og frå Noreg. 

-Sommarprogramma til flyselskapa kom i gang i overgangen mars til april, og voluma aukar dermed også betydeleg når vi går inn i ein travel sesong for reiselivet. Vi merkar oss at flyselskapa forventar høg etterspurnad inn i sommaren, og Avinor skal sørge for at avviklinga ved våre lufthamner går bra, slik at dei reisande får ei god oppleving på flyplassen, avsluttar Riise. 

Passasjertal og flyrørsler i april

2,5 millionar passasjerar reiste innanlands i april, ein auke på 14 prosent frå april i fjor.  

Talet på reisande utanlands var 1,6 millionar, ein auke på 5 prosent frå i fjor. Samanlagt er det 10 prosent fleire reisande enn i april i fjor. 

Det var 62 675 flyrørsler i april. Dette er 6 prosent meir enn i april i fjor.  

Sjå fleire trafikktal i vedlegga. 

Ny rekord i droneflyging - meir enn 2000 flygingar i april 

I april vart det meldt inn 2117 flygingar med drone i Ninox Drone, Avinor sitt system for handtering av dronar.   

–Dette er meir enn dobla frå april i fjor, og er fyrste gong vi har over 2.000 flygingar i Ninox Drone på ein månad, seier Mats Gjertsen som leiar Avinor sitt droneprogram.  

- Varmare og betre vêr gir fleire droneflygingar, og vi ventar framleis stor auke i bruken av Ninox Drone, seier Gjertsen.