Startar ny naturfagutdanning ved Høgskulen i Volda

– Me er veldig glade for å kunne tilby denne nye utdanninga, fortel førsteamanuensis Carlos David Magnusson.  

Saman Magnusson er det førsteamanuensis Jan Håkon Vikane, høgskulelektor Øyvind Roger Halse og førsteamanuensis Øyvind Arne Høydal som har utvikla, og underviser i, det nye studiet. 

Vidareutdanning med fokus på fleksibilitet 

Gjennom eit nett- og samlingsbasert studium, Naturfag 8.-13. trinn, vil ein no kunne ta 60 studiepoeng innan naturfag, på særs fleksibelt vis, ved Høgskulen i Volda.  

– Der det tidlegare har vore stram rekkjefølgje på korleis ein kan ta naturfagemne, og i kva tidsrom, har me hatt fokus på fleksibilitet i utforminga av denne vidareutdanninga, fortel førsteamanuensis Jan Håkon Vikane.  

Tanken er at studentane skal kunne tilpasse løpet til sin kvardag. 

– Nokre jobbar kanskje ved sida av studiet og ynskjer berre å ta eitt emne i semesteret, andre har kanskje kapasitet til to eller treng ikkje alle emna som studiet tilbyr. Dette kan ein sjølv setje saman slik det passar for søkjaren, fortset Vikane.  

Samfunnsaktuelt 

I dagens samfunn er det svært varierte saker som dukkar opp i nyheitsbiletet, men overraskande mykje kan linkast til naturfaglege tema.  

– Naturfaga er sentrale i mange av utfordringane samfunnet møter, seier førsteamanuensis Øyvind Arne Høydal 

– Under pandemien såg ein til dømes verdien av å forstå korleis immunforsvaret og bioteknologien bak vaksinar fungerer. Spørsmål om helse, berekraft og klima og miljø er òg stadig oppe i dagen, og ofte får ein motstridande informasjon frå ulike kjelder. Det å ha eit solid kunnskapsgrunnlag og ei evne til å vurdere informasjonen ein får frå ulike hald, vert stadig viktigare i tida som kjem, utdjupar Høydal. 

Etterspørsel i arbeidsmarknaden 

I skulen er det behov for fleire lærarar med 60 studiepoeng innan naturfag, også på ungdomsskulenivå. 

– Dersom ein tek grunnskulelærarutdanning, er det ikkje vanleg at ein kan ta meir enn 30 studiepoeng. Som lærar på vidaregåande er det krav om 60 studiepoeng, og vi opplever også etterspørsel etter dette på ungdomstrinna, forklarer høgskulelektor Øyvind Roger Halse.  

Kven kan søkje? 

Opptakskravet for utdanninga er generell studiekompetanse, og det er løpande opptak med studiestart hausten 2024. Studiet tilbyr fordjuping og kompetanseheving innan naturfag og er tilpassa lærarar. Likevel er studiet også relevant i andre samanhengar: 

–  Studiet er opent for alle med ei interesse for kompetanseheving i naturfag og er ikkje berre for lærarar. Kanskje det er journalistar som ynskjer å spesialisere seg? Kanskje ein skal ha eit friår etter vidaregåande og har ei interesse for det naturfaglege og difor vil ta eitt av emna samtidig? Det er mange moglegheiter, avsluttar Magnusson.