Rekordstor interesse for Klimasats-ordninga (nynorsk)

Miljødirektoratet har fått 407 søknader frå kommunar i alle fylke i landet. Aldri før har kommunane søkt om så mykje i støtte frå Klimasats-ordninga. Det betyr stor konkurranse om potten, som i år er på rundt 220 millionar kroner.

– Kommunane har ei viktig rolle i omstillinga til lågutsleppssamfunnet. Eg er glad for at så mange kommunar har søkt Klimasats-midlar til gjennomføring av nye tiltak som kuttar utslepp og omstiller kommunane, seier klima- og miljøminister Andreas Bjelland Eriksen.

Ved prioritering av søknader legg Miljødirektoratet vekt på mellom anna potensialet for utsleppsreduksjonar på kort og lang sikt, og i kva grad tiltaket gjennom nytenking, involvering av relevante aktørar og moglegheit for varige endringar vil bidra til omstilling.

Sjå kva kommunen din søkjer Klimasats-støtte til i 2024

Her kan du søkje opp kommunen din og fylket ditt, og sjå kva som blir planlagt i nærmiljøet hos deg.

Skapar lokalt engasjement

Søknadsfristen var 15. februar. Miljødirektoratet startar søknadsbehandlinga omgåande og har som mål å gi svar til kommunane om dei får støtte innan slutten av juni 2024.

− Klimasats er ei fleksibel støtteordning som gir kommunane høve til å finne lokalt tilpassa løysingar. Det skaper engasjement, innovasjon og resultat i både små og store kommunar, seier Ellen Hambro, direktør for Miljødirektoratet.

Faktaboks: Om Klimasats-ordninga

• Klimasats er ei støtteordning der kommunar, fylkeskommunar og Longyearbyen lokalstyre kan søkje medfinansiering for å redusere utslepp av klimagassar og leggje til rette for omstilling til lågutsleppssamfunnet.
• Sidan 2016 har over 2000 prosjekt i heile landet fått tilsegn om Klimasats-støtte.

Kuttar utslepp på mange område

Sidan 2016 har Klimasats-ordninga mobilisert kommunar over heile landet, redusert viktige barrierar, endra praksis, gitt erfaringar med ny teknologi og gitt utvikling av metodar og løysingar for å måle klimaeffekten.

Dei konkrete prosjekta har kutta klimagassutslepp gjennom auka bruk av utsleppsfrie maskiner og køyretøy, redusert matsvinn, meir klimavennleg areal- og transportplanlegging, fleire klimatiltak i bygg og meir systematisk arbeid med klimakrav i anskaffingar i heile landet.

Dette vil kommunane gjere i 2024

Ein førebels gjennomgang viser at klimaomsyn i areal- og transportplanlegginga er den kategorien med flest søknader i 2024. Kommunane har søkt støtte til å utvikle kunnskapsgrunnlag for klimaomsyn i arealplanlegging, og arbeidet med å ta klimakunnskapen inn i arealplanane. Som lokal og regional planstyresmakt har kommunane og fylkeskommunane ein unik og avgjerande rolle for å bidra til utsleppskutt frå særleg vegtrafikk og skog- og arealbruk.

Miljødirektoratet har òg fått veldig mange søknader frå kommunar som vil bruke Klimasats-ordninga til å redusere utslepp frå byggje- og anleggsprosjekt, og gjennom offentlege anskaffingar. Kommunar og fylkeskommunar kjøpte inn varer og tenester for 265 milliardar kroner i 2021, inkludert 60 milliardar kroner til bygg- og anleggsverksemd – så her har kommunesektoren store høve til å påverke klimagassutsleppa.

− Eg synest det ser ut som at mange kommunar har fått eit bevisst forhold til kvar det er viktig at dei gjer ein innsats. Søknadsbunken reflekterer sentrale utfordringar som kommunesektoren kan og må gjere noko med, seier miljødirektør Ellen Hambro.

 Fordelinga til søknadene på ulike typar tiltak

Type tiltak	Talet på søknader	Sum søkt
Generell søknad, m.a. energi, mat, sirkulær, landbruk	114	252 193 534
Areal og transportplanlegging	76	66 230 225
Tidleg kartlegging av moglege klimatiltak i bygg og anlegg	49	15 246 750
Meirkostnader i bygg og anlegg (inkluderer  mange utsleppsfrie byggjeplassar)	45	151 551 914
Forprosjekt til alle typar klimatiltak; bygg, sirkulær økonomi, energi, landbruk og skog med meir	40	11 551 885
Meirkostnader utsleppsfrie maskiner	28	54 285 565
Systematisk arbeid med klimakrav i anskaffingar	24	34 301 100
Meirkostnader i konkrete anskaffingar (unntatt maskiner og bygg/byggjeplass)	19	106 10 562
Transporttiltak	12	22 024 750
Totalsum		711 996 285

Fylkesvis fordeling av søknadene  

Fylke	Talet på søknader	Sum søkt
Agder	34	44 884 222
Akershus	45	63 324 651
Buskerud	25	44 195 700
Finnmark	1	8 500 000
Innlandet	22	21 248 575
Møre og Romsdal	30	26 713 600
Nordland	11	40 214 000
Oslo	22	48 560 750
Rogaland	25	50 047 254
Svalbard	3	10 250 000
Telemark	22	25 473 460
Troms	13	11 822 408
Trøndelag	67	92 755 750
Vestfold	23	64 077 175
Vestland	44	118 033 000 (mest)
Østfold	20	41 895 740
Totalsum	407	711 996 285

Søkjarar med flest søknader

Kommune	Talet på søknader	Sum søkt
Oslo kommune	21	45 710 750
Trondheim kommune	21	33 217 250
Bergen kommune	18	39 083 500
Drammen kommune	15	34 196 600
Trøndelag fylkeskommune	13	30 541 925
Kristiansand kommune	11	26 565 000
Stavanger kommune	11	17 509 500
Malvik kommune	11	5 435 375
Vestland fylkeskommune	9	42 183 500
Nordre Follo kommune	8	11 752 000
Lørenskog kommune	8	7 402 000
Tønsberg kommune	7	18 953 500
Innlandet fylkeskommune	7	10 895 000
Tromsø kommune	7	5 199 000
Arendal kommune	7	4 730 000
Asker kommune	6	15 137 050
Indre Østfold kommune	6	11 414 000
Melhus kommune	6	6 973 000
Porsgrunn kommune	6	6 360 000

Tilskot til naturmangfald

Kommunar kunne tidlegare i år søkje Miljødirektoratet om tilskot til varetaking av naturmangfald i arealplanlegginga.

I første halvår vil det i tillegg opnast ei ny ordning der kommunar kan søkje om tilskot til å gjennomføre tiltak for å vareta naturmangfald. Det vil komme meir informasjon om denne frå Miljødirektoratet seinare.