—Gode lokalaviser er grunnsteinar i opne og gode lokalsamfunn, og eg gler meg til å byggje vidare på den gode jobben som over år er lagt ned i Møre-Nytt. Ørsta og Volda er ein levande og sterk del av Sunnmøre og eg vil gjere det eg maktar for at vi leverer så godt journalistisk handverk som mogeleg, og at vi kan vidareutvikle Møre-Nytt for framtida, seier Tormod Utne.

Møre-Nytt er det største mediehuset i Ørsta og Volda og har eit opplag på om lag 5.000. Lokalavisa gjev lesarane kvalitetsinnhald digitalt heile døgnet og kjem ut med papiravis to gonger i veka. Møre-Nytt er heileigd av Sunnmørsposten AS, og er ein del av mediekonsernet Polaris Media ASA. Utne gleder seg til å ta fatt på jobben.

—Eg ser fram til å bli endå betre kjend med dei som arbeider i avisa, og håpar å ta med meg nyttig erfaring både frå eit liv i norsk presse og i Norsk Presseforbund, slik at det blir til det beste for Møre-Nytt og lesarane våre.

Tormod Utne vil starte i stillinga 1. februar 2024 og tar over etter redaktør Svein Jarle Aam som skal i gong med nye prosjekt.

—Vi er særs nøgd med tilsettinga av Tormod Utne som ny eineleiar i mediehuset. Han har lang erfaring, digital spisskompetanse og kjenner lesarane, nærmiljøet og næringslivet godt. Med Tormod på laget har vi alle mogelegheiter til å ta nye steg og gje lesarane god journalistikk på alle plattformer, seier styreleiar Frank Støyva Emblem.