Eit åtak på universitets- og høgskulesektoren

SFU er ei nasjonal prestisjeordning som vart oppretta av kunnskapsdepartementet i 2010. Målet med ordninga er å utvikle kvalitet i høgare utdanning, samt likestille utdanning med forsking og innovasjon. Gjennom SFU-ordninga får dei fremste utdanningsmiljøa i Noreg ressursar til å vidareutvikle studiane sine gjennom målretta og langsiktig innsats.

– Forslaget om å fjerne SFU-ordninga signaliserer at regjeringa ikkje set utdanning like høgt som dei andre oppdraga til UH-sektoren. SFU-ordninga var oppretta som følge av ein grundig vurderingsprosess, og forslaget om å fjerne den er ikkje utreia, seier Nasjida Noorestany, Studentprosjektleiar i CELL (Senter for erfaringsbasert juridisk læring).

Studentmedverknad i fokus

Per i dag finnast det femten SFU-ar i forskjellege fasar av ei planlagt tiårig senterperiode. Noko alle sentera har til felles er at studentar spelar ei aktiv og sentral rolle i det innovative utviklingsarbeidet. No er studentane skuffa.

– Studentmedverknaden er noko av det som gjer SFU-ordninga så unik. Vi kjem med verdifull, direkte erfaring som skapar målbare, varige endringar i utdanningskvaliteten. Det er uforståeleg at regjeringa ynskjer å kutte ei så god ordning, særskilt før mange av prosjekta er fullført. Dette viser nok ein gong at den sittande regjeringa er i utakt med UH-sektoren, seier Sondre Østensen-Landvik, studentsenterleiar i CELL.

Gode resultat

SFU-ordninga har blitt evaluert fleire gongar sidan oppstart. Resultata har vore positive og ordninga har fått brei støtte både politisk og i UH-sektoren. Det finnast mange dømer på handfaste resultat. På matematikkstudiet på Sørlandet har gjennomføringsgraden ved enkelte program auka frå under 60% til nærmare 90%. I Trøndelag har arbeidet med auka rekruttering og gjennomføring i IT-utdanninga ført til 500 fleire studentar og ei omlegging av fyrsteåret. Jussutdanninga i Oslo gjennomgår no ein historisk moderniseringsprosess for å førebu studentane på dei store samfunnsutfordringane dei snart vil møte.