EPRA (European Platform of Regulatory Authorities) blei etablert i 1995 og skal legge til rette for samarbeid og erfaringsutveksling mellom mediemyndigheiter på tvers av land i Europa.

– Raske og store endringar på mediefeltet gjer at også mediemyndigheitene kontinuerleg må utvikle rolla si og arbeidsformene sine. I den konteksten er samarbeid og erfaringsdeling på tvers av landegrenser svært viktig, seier nyvald styreleiar Mari Velsand.

Europeisk samarbeid om oppgåver på mediefeltet

Velsand har vore medlem i styret i EPRA dei siste fire åra og er no altså vald som leiar for styret dei kommande to åra. Andre styremedlemmer er Maria Donde frå Storbritannia, Stephanie Comey frå Irland, Stanislav Matejka frå Slovakia og Valentin Alexandru Jucan frå Romania. Sekretariatet i EPRA er lokalisert i Strasbourg i Frankrike.

– Eg ser fram til å leie arbeidet med å vidareutvikle det europeiske samarbeidet mellom myndigheiter som har oppgåver på mediefeltet, seier Velsand.

160 delegatar frå over 50 land møtest denne veka i Oslo

Medietilsynet er denne veka vertskap for vårens plenumsmøte i EPRA, som blir halde i Oslo. Møtet samlar cirka 160 delegatar frå meir enn 50 land.

– Dette har vore eit stort løft for ein liten organisasjon som Medietilsynet, men det er viktig for oss å kunne bidra til det europeiske fellesskapet gjennom å vere vertskap for vårens EPRA-møte, seier Mari Velsand.

Haustens møte i EPRA er lagt til Romania.