Vil ha fleire søknadar frå Hardanger

Dei sju ordførarane i Hardangerrådet besøkte denne veka Kulturminnefondet på Røros.

Kulturminnefondet får svært få søknadar frå private eigarar i Hardanger, og Hardangerrådet kom tysdag og onsdag denne veka på besøk til Røros for å høyre meir om moglegheitene Kulturminnefondet gir for private eigarar av verneverdige kulturminne.

Etter eit besøk som både innehald mykje informasjon om tilskot til kulturminne, og opplevingar i verdsarven Røros, reiser Hardangerrådet no heim for å gjere ein ekstra innsats for å få fleire private eigarar til å søke. Kulturminnefondet planlegger og eit informasjonsmøte i Hardanger for interesserte, i samarbeid med Hardangerrådet.

Hardangerrådet er eti interkommunalt selskap, der hovudoppgåva er å styrkja regionen gjennom større grad av forpliktande samarbeid. Rådets øvste organ er Regionrådet, som består av dei sju ordførarane i Hardanger.

Kulturminnefondet er ei tilskotsordning for private eigarar av verneverdige kulturminne, og dei som eig eit kulturminne kan søkje om støtte til ulike tiltak for å setja dette i stand.