Løyve til fem småkraftverk ved Fjærlandsfjorden og ny kraftleidning Fjærland - Grindsdalen

Småkraft AS har søkt om løyve til å bygge fem småkraftverk ved Fjærlandsfjorden som etter omsøkt plan vil gje ein årsproduksjon på rundt 120 GWh. Eksisterande leidningsnett i Fjærland har for liten kapasitet til å mate inn krafta frå dei fem småkraftverka. Sognekraft AS har difor søkt om løyve til å bygge ein ny 132 kV kraftleidning frå Fjærland til Grindsdalen med ny transformatorstasjon i Lidal.

Hovudargumenta imot ein utbygging av småkraftverka i Fjærland er i hovudsak knytt til det totale landskapsbiletet, negativ verknad på opplevingskvaliteten i Fjærlandsfjorden som følgje av tekniske inngrep og redusert vassføring.

Småkraftprosjekta vil ha innverknad på fem av totalt 30 elver rundt Fjærlandsfjorden. NVE meiner det er mogeleg å gjennomføre alle dei omsøkte prosjekta, med tilhøyrande nett-tilknyting, utan vesentlege negative verknader for landskapsopplevinga i Fjærland. Føresetnaden er mellom anna ein god minstevassføring heile året, spesielt om sommaren, i tillegg til generelle krav til detaljplangodkjenning og landskapsmessige tilpassingar.

Det er gitt løyve på vilkår at heile vassvegen skal leggjast i fjell for Romøyri-, Lidal- og Hatlestad kraftverk og delvis i fjell for Berge/Bjåstad kraftverk. NVE krev at den nye kraftleidningen skal leggjast i kabel saman med vassvegen i fjell frå Lidal kraftverk og transformatorstasjon, og 200- 300 meter opp fjellsida.

Det er i hovudsak bygging av Lidal kraftverk, Romøyri kraftverk og ny 132 kV kraftlinje som vil føre til reduksjon av inngrepsfrie naturområde. NVE legg vekt på at områda i dag ikkje gjev inntrykk av å vere inngrepsfrie då kraftleidningar, hus og stålmaster set sitt preg på området. Dei omsøkte anlegga vil gjere at 17 km av dagens 22 kV-luftleidningar langs Fjærlandsfjorden og eit fjordspenn kan sanerast. NVE ser dette som positivt for landskapsbiletet.

NVE legg stor vekt på at utbygginga kan gje auka verdiskaping og positive ringverknader i lokalsamfunnet i tillegg til eit monaleg bidrag til ny fornybar energi, Ein 132 kV-leidning vil òg legge til rette for ei framtidig utnytting av vasskraftressursane i Fjærlandsområdet innafor miljømessig akseptable rammar.

NVE har pålagt at det skal sleppast ei heilårleg minstevassføring på alle utbyggingsstrekningane som er vesentleg større enn omsøkt. Pålagt minstevassføring vil redusere den årlege produksjonen med om lag 10 GWh, slik at gjennomsnittleg årsproduksjon vert rundt 110 GWh. Det svarar til den årlege straumbruken til omlag 5500 husstandar.

NVE vurderer at utbygginga med dei fastsette avbøtande tiltaka er akseptabel i høve til allmenne og private interesser.

Meir om kraftverka på www.nve.no

 

Kontaktpersonar
Avdelingsdirektør Rune Flatby, tlf. 22 95 90 88 / 416 78 203
Seksjonssjef Øystein Grundt , tlf. 22 95 93 89/90 19 82 16